Misir Prezidenti Əbdülfəttah əs-Sisi və Beynəlxalq Atom Enerjisi Agentliyinin baş direktoru Yukiya Amano Rusiyanın iştirakı ilə “Ad-Dabaa” atom elektrik stansiyasının (AES-in) tikilməsi layihəsi çərçivəsində nüvə təhlükəsizliyi mövzusunu və ikitərəfli münasibətləri Qahirədə müzakirə ediblər.
Bu barədə Misir Prezidentinin rəsmi nümayəndəsi Bassam Radi öz açıqlamasında bildirib.
Görüşdə Misir lideri “Ad-Dabaa" AES-in qurulmasından ölkənin inkişaf hədəflərinə çatmaq üçün faydalanmaq planlarından danışıb. O, Qahirə ilə Agentlik arasında əməkdaşlıq əlaqələrini möhkəmləndirmək niyyətində olduğunu bildirib. Əbdülfəttah əs-Sisi stansiyada nüvə təhlükəsizliyi sahəsində ən qabaqcıl beynəlxalq standartları tətbiq edəcəyini xüsusi vurğulayıb.
Beynəlxalq Atom Enerjisi Agentliyinin baş direktoru Yukiya Amano Misirin regional və beynəlxalq arenalarda nüvə silahlarının yayılmaması və atom enerjisindən dinc məqsədlərlə istifadə sahələrindəki fəal rolunu qeyd edib. O, Agentliyin də Misirlə əlaqələrin genişləndirilməsində maraqlı olduğunu söyləyib.