Abşeron rayonunun yaranmasının 55 illik yubileyinə həsr olunan aksiya Abşeron rayon İcra Hakimiyyətinin dəstəyi ilə reallaşdırılır. Xırdalan şəhərindəki Abşeron Olimpiya Kompleksinin həyətində düzənlənən növbəti ağacəkmə aksiyasına ilk dəfə olaraq “Qarabağ qaziləri” ambutant futbol federasiyasıda qoşulub. Federasiyanın üzvlərinin (Qarabağ qaziləri) və rayonun fəal gənclərinin iştirak etdiyi aksiya zamanı ətraf ərazi tullantılardan təmizlənib, mövcud olan yaşıllığa aqrotexniki qulluq göstərilib, 100-ə yaxın xan çinarı əkilib.
Aksiyanın məqsədi gənc nəsil arasında ətraf mühitin qorunması, ekoloji tərbiyənin gücləndirilməsi və təbiətə qayğı hissi aşılamaqdır.
Məlumat üçün bildirək ki, cari il ərzində Abşeron rayonunda dəfələrlə kütləvi ağacəkmə aksiyaları keçirilib. Belə ki, Abşeron rayonunda yaşıllaşdırma işləri çərçivəsində Rayon İcra Hakimiyyətinin təşkilatçılığı ilə Xırdalan şəhəri, Hökməli –Qobu, Novxanı-Binəqədi, Digah - Mehdiabad, Bakı-Şamaxı və Bakı Sumqayıt avtomobil yolunun Abşeron rayon ərazisindən keçən hissələrində təkcə bu il ərzində 20 min alyandr,15 min xan çinarı, 12 min şam ağacı, 6 min zeytun, 8 min isə meyvə ağacları əkilib. Ümumilikdə isə cari ildə rayonun kənd və qəsəbələrində 61 min ağac və gül kolları əkilib.
Şamo Əliyev