Azərbaycanın igid oğullarından biri Daşdəmirov Elmar Rəcəb oğlunun şəhidliyinin 25 illiyi ilə əlaqədar bu gün Abşeron Rayon İcra Hakimiyyətinin əməkdaşları və Xırdalan şəhər icra nümayəndəliyi şəhidin ailəsini ziyarət ediblər. Şəhidin anası Bəyimxanım Daşdəmirova bildirib ki, Xırdalan şəhər sakini, şəhid Elmar Daşdəmirovun bu gün anım günüdür. Elmar Rəcəb oğlu Daşdəmirov 1975-ci ildə dekabrın 23-də anadan olub. 90 nömrəli peşəlitseyində təhsil alan Elmar ermənilərin azərbaycanlılara qarşı amansız münasibətinə, torpaqlarımızı işğalına dözə bilməyərək birbaşa ön cəbhəyə gedib.
Cəbhə yoldaşları ilə birlikdə Vətən uğrunda mənfur düşmənə qarşı vuruşub. 1994-cü il aprelin 23-də Ağdamın Güllicə kəndində gedən döyüşlərdə Elmar Daşdəmirov igidlik göstərərək kəndin düşmənin əlinə keçməsinə imkan verməyib, ermənilərə qarşı döyüşüb və qəhrəmancasına şəhid olub.
Şəhidin anası və yaxınları rayon rəhbərinə Abşeronda şəhid ailələrini daim diqqətdə saxladığına, səmimi münasibətə görə təşəkkür ediblər.
Azərbaycanın suverenliyi, ərazi bütövlüyü və torpaqlarımızın müdafiəsi uğrunda gedən döyüşlərdə Abşeron rayonundan 199 şəxsin şəhid olduğunu vurğulayan Abşeron RİH-in rəsmisi Vuqar Bəşirov qeyd edib ki, Abşeron rayonunda şəhid ailələrinə, Qarabağ əlillərinə, ümumilikdə müharibə təbəqəsinə olan diqqət və qayğı yüksək səviyyədədir.
Abşeron rayon İcra Hakimiyyəti başçısının Хırdalan şəhər inzibati ərazi dairəsi üzrə nümayəndəsi Rafiq Yusubov qeyd edib ki, Rayon İcra Hakimiyyətinin başçısı İradə Gülməmmədova da mütəmadi olaraq Milli qəhrəmanların və şəhidlərin ailə üzvləri ilə görüşlər keçirir, onların problemlərini dinləyir, əlamətdar günlərdə, Ramazan bayramı, Qurban bayramı, Yeni il və Novruz bayramlarında bu kateqoriyadan olan insanlara baş çəkir, mənəvi köməklik göstərir.
Şamo Əliyev