Ailə, Qadın və Uşaq Problemləri üzrə Dövlət Komitəsi və Abşeron Rayon İcra Hakimiyyətinin birgə təşkilatçılığı ilə Azərbaycan ailəsinə xas dəyərlərin və sağlam həyat tərzinin təbliği,ailələrin asudə vaxtının səmərəli təşkili məqsədi ilə “Ümumdünya Əhali günü”nə həsr edilən “Bizim gücümüz birliyimizdədir” adlı maarifləndirici tədbir keçirilib.
Xırdalan şəhərindəki AAAF park yaşayış kompleksində Abşeronun nümunəvi ailələri ilə keçirilən görüşü giriş sözü ilə açan Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova tədbir iştirakçılarına bu günün yaranma tarixi barədə məlumat verərək qeyd edib ki, bu əlamətdar günü 1989-cu ildə BMT-nin əhali problemlərinin həllinə yardım göstərən ən iri beynəlxalq təşkilatı olan Əhali Fondu təsis edib.Vurğulayıb ki,məqsəd insanların problemlərinə xüsusi diqqət yetirmək və ümumi inkişafa nail olmaqdır.
İcra Hakimiyyəti başçısının 1-ci müavini İradə Gülməmmədova bildirib ki, “Ümumdünya Əhali günü” ilk dəfə olaraq 2005-ci ildən Azərbaycanda geniş şəkildə qeyd olunmağa başlanıb və Abşeronda da hər il bu gün xüsusi qeyd olunur,rayonda yaşayan aztəminatlı ailələrin problemləri daim diqqət mərkəzində saxlanılır.Tədbirdə Azərbaycanda ailə dəyərləri, ailə institutunun formalaşması və qorunub saxlanılmasında milli dəyərlərin rolu və digər mövzular ətrafında müzakirələr aparılıb, ekspertlərin çıxışları dinlənilib.Ailələr arasında intellektual oyun və yaşayış kompleksindəki istirahət parkında gəzinti təşkil edilib,uşaqlar buradkı atraksionlardan pulsuz olaraq bəhrələniblər.Tədbir nahar süfrəsi ilə davam edib.