Abşeron rayonunda növbəti səyyar qəbul Ceyranbatan qəsəbəsində keçirilib Abşeron rayonunda əhalinin problemlərinin həlli məqsədilə mütəmadi olaraq görüşlər keçirilir, ardıcıl tədbirlər görülür.Sentyabrın 18-də Abşeron rayon İcra Hakimiyyətinin başçısı xanım İradə Gülməmmədova rayonun Ceyranbatan qəsəbəsində əhali ilə səyyar qəbul-görüş keçirmişdir. Səyyar qəbul-görüşü açan Abşeron rayon İcra Hakimiyyətinin başçısı xanım İradə Gülməmmədova əsası ulu öndər Heydər Əliyev tərəfindən qoyulmuş sosial-iqtisadi inkişaf siyasətinin bu gün onun siyasi kursunun layiqli davamçısı möhtərəm Prezidentimiz cənab İlham Əliyev tərəfindən uğurla davam etdirildiyini bildirmiş və regionların sürətli sosial-iqtisadi inkişafından söz açmış, daha sonra Abşeron rayonunun sosial-iqtisadi inkişafı ilə bağlı rayonun infrastrukturunun yaxşılaşdırılması istiqamətində görülmüş işlərdən danışmışdır. Bildirmişdir ki, ölkə Prezidenti cənab İlham Əliyevin Abşerona növbəti tarixi səfəri zamanı burada gedən tikinti-abadlıq, quruculuq işlərindən razi qalması bütün Abşeronlulara böyük ruh yüksəkliyi yaratmış, rayonda bu sahədə həyata keçirilən işlərin daha geniş vüsət almasına stimul vermişdir.
Keçirilən qəbul-görüşdə əhalini narahat edən problem və qayğılar dərindən öyrənilmiş, onların həlli istiqamətində elə yerindəcə aidiyyəti qurumların rəhbərlərinə konkret tapşırıqlar verilmişdir. Səyyar qəbul-görüşdə Rayon İcra Hakimiyyəti başçısının müavinləri, aparatın şöbə müdirləri, məsul işçiləri, rayonun hüquq-mühafizə orqanlarının, səhiyyə, təhsil, mədəniyyət, digər xidmət təşkilatlarının rəhbərləri, ərazi icra nümayəndəsi və bələdiyyə sədri, KİV nümayəndələri iştirak etmişlər.
Kənd sakinlərindən Zeynəb Əliyeva, Seyid Əbdül, Reyhan Zahidova, Arif Sadıqov, Fəridə Məmmədova, Varaşil İsmayılov, Şəhriyar Zülfüqarov, və başqaları qəsəbədə əhalinin həyat şəraiti və mövcud olan bəzi problemlərdən söz açaraq, arzu və təkliflərini bildirmişlər. Qeyd olunmuşdur ki, Bakı-Sumqayıt yolunun Ceyranbatan və Saray qəsəbələrini birləşdirən hissəsində piyada kecidinə, qəsəbədə idman kompleksinin tikintisinə , Ceyranbatan qəsəbə həkim ambulatoriyasının əsaslı təmir olunmasına və s.ehtiyac var.
Görüşdə sakinlər tərəfindən qaldırılan məsələlərin böyük əksəriyyəti yerindəcə həllini tapmış, digərlər məsələlər isə həll edilməsi üçün aidiyyəti qurumların rəhbərlərinə tapşırılmışdır.
Qəsəbə sakinləri əhalinin problemlərinin həlli istiqamətində həyata keçirilən tədbirlərdən, rayonda aparılan abadlıq-quruculuq işlərindən razılıqlarını bildirərək, göstərilən diqqət və qayğıya görə rayon icra hakimiyyətinin başçısına öz minnətdarlıqlarını bildirmişlər.
Baş redaktor: Şamo Əliyev
