Kanadanın Monreal şəhərində 1919-cu ildə Qafqaz İslam Ordusunun Bakını erməni-bolşevik işğalından azad etməsinin 97-ci ildönümü münasibətilə Azərbaycan icması tərəfindən tədbir təşkil edilib.
Diasporumuzun nümayəndələrinin qatıldığı tədbirdə Azərbaycanın Kanadadakı müvəqqəti işlər vəkili Ramil Hüseynli də iştirak edib.
Monrealdakı Azərbaycan icmasının rəhbəri Məsud Əliyev tədbirdə çıxış edərək Qafqaz İslam Ordusunun şücaətindən danışıb, 97 il öncə Bakının düşməndən azad edilməsinin xalqımızın tarixində ən şərəfli səhifələrdən biri olduğunu vurğulayıb.
Müvəqqəti işlər vəkili R.Hüseynli Monreala əvvəlki səfərləri çərçivəsində, eləcə də Ottavada səfirliyin keçirdiyi tədbirlərdə yaxından iştirak edən icma üzvləri ilə görüşlərindən söhbət açıb, Bakının erməni-bolşevik işğalından azad edilməsində Qafqaz İslam Ordusunun tarixi rolundan danışıb.
Sentyabrın əvvəlində 39-cu Beynəlxalq Film Festivalı çərçivəsində rejissor Vahid Mustafayevin “Qanlı Yanvar” filminin Monreal şəhərində premyerasının uğurla keçdiyini söyləyən R.Hüseynli həmvətənlərimizi belə tədbirlərdə daha fəal olmağa çağırıb.
Müvəqqəti işlər vəkili bildirib ki, ölkəmizin Kanadada təbliğində diasporumuz həlledici rol oynamalıdır və onların bu istiqamətdə həmrəylik nümayiş etdirməsi xüsusi əhəmiyyət kəsb edir.
R.Hüseynli diaspor nümayəndələrini ölkəmizlə bağlı həqiqətlərin dünya ictimaiyyətinə çatdırılmasında, eləcə də milli mədəniyyətimizin Kanadada təbliğində fəallıq və birlik nümayiş etdirməyə çağırıb.
Redaktor: Ayşə Bayramova