“Mətanət A” şirkəti 4 yeni zavodun ilkin araşdırma və layihələndirmə işlərinə başlamışdır.
Bunu “Mətanət A” şirkətinin baş direktoru Elxan Bəşirov bildirib.
“Bunlar ilik istehsal gücləri - Qaradağ rayonunda 8 milyon m2 olan Gips-karton və 35 min ton olan Mineral yun, Qazax rayonunda 50 min ton olan Əhəng və Balaxanıda 300 min ton olan Kvars qumunun zənginləşdirilməsi zavodlarıdır. Bu zavodların yaradılmasına ümumilikdə 105 milyon manat investisiya qoyulacaq və dövlətin güzəştli kreditlərindən də istifadə olunacaqdır. Zavodların yaradılması nəticəsində 1500 daimi iş yerləri açılacaqdır”,- o deyib.
Elxan Bəşirov qeyd edib ki, istehsal olunan məhsullar ilə daxili təlabat ödənilməklə yanaşı ixrac da olunacaqdır.
2000-ci ildə yaradılmış “Mətanət A” şirkətinin tərkibinə; Abşeron rayonunda yerləşən quru inşaat qarışıqları, boya və beton qatqıları zavodları, Qazax rayonunda hazırda tikintisi aparılan əhəng zavodu, Qaradağdakı gips-hörgü bloku, “Ağdağ-gips” və yeni “Ağdağ-gips” zavodları daxil olmaqla 7 zavod daxildir. Şirkət 1000 –dən çox məhsul çeşidinə və 200-dən çox ticarət nişanına malikdir. Hazırda şirkətdə 800 nəfərdən çox insan çalışır.