“1 Mart - Beynəlxalq Mülki Müdafiə Günü” ilə bağlı Abşeron rayon İcra Hakimiyyətinin təşkilatçılığı ilə fövqəlada hallar zamanı “nə etməli” mövzusunda təlim keçirilib. Xırdalan şəhər 9 nömrəli tam orta məktəbdə baş tutan təlimdə
müəllim-şagird kollektivi ilə yanaşı Rayon İcra Hakimiyyəti başçısının müavini, Rayon Fövqəladə Hallar Komissiyasının sədri İlham Quliyev və Abşeron rayon Təhsil Şöbəsinin əməkdaşları iştirak edibdilər.
Öncə mülki müdafiə gününə həsr olunan "açıq dərs"lər keçirilib. Dərslərdə şagirdlər zəlzələlər, torpaq sürüşmələri, qaz partlamaları, vulkanlar, yanğınlar və s. mövzularda öz biliklərini ifadə ediblər. Sonra məktəbin foyesində süni yanğın səhnəsi təşkil edilərək şərti xəbərdarlıq siqnalı ilə məktəbdə "Zəlzələ" həyəcanı elan edilib. Növbətçi müəllimlərin köməyi ilə şagirdlər təxliyə edilib.
Daha sonra Abşeron rayon İcra Hakimiyyəti başçısının müavini İlham Quliyev Beynəlxalq Mülki Müdafiə Təşkilatının yaranma tarixindən danışıb. Bu gün münasibəti ilə Rayon İcra Hakimiyyəti tərəfindən müvafiq sərəncamın qəbul olunduğunu və tədbirlər planının hazırlandığını qeyd edən İ.Quliyevin sözlərinə görə, rayonun bir çox idarə və təşkilatlarında, o cümlədən təhsil müəssisələrində mararifləndirici xarakterli tədbirlər keçirilib.
İ.Quliyev vurğulayıb ki, Beynəlxalq Mülki Müdafiə Təşkilatı Baş Məclisinin qərarı ilə 1972-ci ildən etibarən hər il 1 mart tarixi üzv ölkələrində "Ümumdünya Mülki Müdafiə günü" kimi qeyd edilir: “Azərbaycan Respublikası bu beynəlxalq təşkilatda 1993-cü ildən təmsil olunur. Bu nüfuzlu beynəlxalq qurum ən mürəkkəb fövqəladə hallar baş verdikdə əhatə etdiyi ölkələrə yardım göstərir, həmin ölkələrdə mühafizə xidmətini inkişaf etdirir, möhkəmləndirir və əlaqələndirir. Azərbaycan Respublikası bu təşkilatın üzvlüyünə qəbul edildiyi üçün hər il onun keçirdiyi bütün tədbirlərdə fəal iştirak edir”.