Bu gün Abşeron məktəbləri arasında “yumor səhnəcikləri” yarışmasına start verilib. Azərbaycan Yazılar Birliyi Abşeron bölməsinin və Abşeron rayon Təhsil şöbəsinin təşkilatçılığı ilə Xırdalan şəhər Heydər Əliyev Mərkəzində reallaşan yarışmada bölmə sədri Şəhla Ağbulud tədbirin keçirilmə zərurəti və məqsədləri barəsində məlumat verib. Məktəblərdə istedadlı şagirdlərin aktyorluq qabilyyətinin aşkar edilməsinə çalışdıqlarını vurğulayan Ş.Ağbulud münsiflər heyyətinin üzvlərini - Mədəniyyət və İncəsənət Üniversitetinin müəllimi, Musiqili Komedya Teatrının aktyoru, əməkdar artist Nadir Xasiyevi, Abşeron rayon İcra Hakimiyyətinin məsul işçisi Elvin Zalovu və Abşeron təhsili qəzetinin baş redaktorunu tədbir iştirakçılarına təqdim edib.
Qeyd edək ki, yarışmada ümumilikdə 38 məktəb iştirak edir. İlkin mərhələdə Xırdalan şəhərində yerləşən 10 məktəb finala vəsiqə qazanmaq üçün bir-birindən maraqlı yumoristik səhnəciklər nümayiş etdiriblər. Şagirdlər göstərdikləri səhnəciklərdə “Ailə-məişət” , “Şagird –müəllim” münasibətlərinə toxunublar. Hər səhnəcik başa catdıqdan sonra münsiflər heyyətinin üzvləri öz rəy və tövsiyyələrini bildirərək 10 ballıq sistemdə qiymətləndiriblər.
Nəticələrə görə, Xırdalan 1 və 5 nömrəli tam orta məktəblərin şagirdlərinin hazırladıqları yumoristik səhnəciklər ən yüksək balla- 10 balla qiymətləndirilib.