Bu gün Xırdalan şəhərində yerləşən Heydər Əliyev Mərkəzində “Azərbaycanda radikal dini cərəyanlar və onlara qarşı mübarizə” mövzusunda regional konfrans keçirilib. Konfransda Abşeron Rayon İcra Hakimiyyətinin başçısı İradə Gülməmmədova, Dini Qurumlarla İş üzrə Dövlət Komitəsinin (DQİDK) sədr müavini Səyavuş Heydərov, Baş Prokurorluğun idarə prokuroru Alim Cəbrayılov, Daxili İşlər Nazirliyi Baş İctimai Təhlükəsizlik İdarəsinin rəis müavini Hikmət Eyvazov, Sumqayıt Apellyasiya Məhkəməsinin sədri Səadət Bəktaşi, eləcə də Daxili İşlər və Ədliyyə nazirliklərinin, Dövlət Təhlükəsizliyi Xidmətinin, DQİDK-nin və yerli icra hakimiyyəti orqanlarının rəsmi şəxsləri, bu qurumların Sumqayıt, Abşeron, Xızı, Qobustan, Zəngilan və Qubadlı rayonlarındakı strukturlarının rəhbər və məsul nümayəndələri, bələdiyyə üzvləri iştirak ediblər.
Tədbir iştiralçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponat və fotoşəkillərə baxıb, mərkəzin gündəlik fəaliyyəti ilə tanış olublar.
Konfransı açıq elan edən Abşeron Rayon İcra Hakimiyyətinin başçısı İradə Gülməmmədova Azərbaycanda tolerantlığın qorunduğu və təbliğ edildiyini vurğulayaraq ölkəmizdə dini zəmində qarşıdurmanın olmadıdığı bildirib. Azərbaycan əhalisinin əsrlər boyu qarşılıqlı hörmət, multikultral dəyərlərlə yaşadığını xatırladan icra başçısı bu dəyərlərin və mövcud sabitliyin qorunmasının vacibliyini qeyd edib.
Sonra çıxış edən Dini Qurumlarla İş üzrə Dövlət Komitəsinin (DQİDK) sədr müavini Səyavuş Heydərov cəmiyyətə dini ekstrizmlə bağlı kifayət qədər məlumatların ötürüldüyünü vurğulayaraq dini radikalizm və onun fəsadları barədəsində danlışıb. Cəmiyyət tərəfindən bəzi qüvvələrin din pərdəsi altında ölkəmizin ictimai-siyasi sabitliyinə, dövlətimizin hüquqi, demokratik əsaslarına qarşı yönəldilmiş pozuculuq fəaliyyətləri, vətəndaşlarımızı xaricdə fəaliyyət göstərən dini ekstremist qrupların və onların silahlı dəstələrinin tərkibinə qoşmaq cəhdlərinin qətiyyətlə pislənildiyini vurğulayan sədr müavininin sözlərinə görə, bu cür əməllər törətməyə cəhd edənlərə qarşı dövlət qurumları tərəfindən mübarizə tədbirləri aparılıb.
Dünyada dini zəmində baş verən qarşıdurmalara, Suriya, Əfqanıstan və digər ərazilərdə yaşanan qanlı toqquşmalara diqqət çəkən S.Heydərov bu hadisələrin böyük güclər tərəfindən idarə olunduğunu və müharibələrin də məhz müsəlmanların yaşadığı ölkələrdə baş verdiyini söyləyib. O qeyd edib ki, din və dindarlıq siyasiləşir. Bu siyasiləşmənin də yaxşı heç nə vəd etmədiyini vurğulayan komitə sədrinin qənaətincə, radikalizmə qarşı təkcə dövlət deyil, eyni zamanda bütün cəmiyyət mübarizə aparmalıdır. İŞİD-in timsalında yeni və dağıdıcı dinin yaradılmasına çalışıldığını, bəşəriyyətin qarşısında belə bir təhlükənin olduğunu söyləyən sədr müavini qeyd edib ki, bu da dünyaya ağalıq etmək istəyən qüvvələrin səhvidir.
Sonra Baş Prokurorluğun İdarə Prokuroru Alim Cəbrayılov və Daxili İşlər Nazirliyinin Baş İctimayi Təhlükəsizlik İdarəsinin rəisi Hikmət Eyvazov çıxış edərək dini radikalizmə qarşı görülən tədbirlərdən danışıblar. Çıxışçılar bildirblər ki, ölkəmizdə hər hansı radikal qrupların fəaliyyət göstərməsinə imkan verilmir və verilməyəcək. Qeyd olunub ki, radikal dini qrupların Azərbaycanda fəaliyyətinin aradan qaldırılması üçün son vaxtlar çox böyük işlər görülüb və bu işlər hazırda nəticə verməkdədir. Radikalizmə qarşı aparılan mübarizə bir an da olsun dayanmayacaq və bu tədbirlər ölkədə radikal qrupların fəaliyyəti tam aradan qalxana qədər davam etdiriləcək.
Tədbirə yekun vuran Abşeron Rayon İcra Hakimiyyətinin başçısı İradə Gülməmmədova konfransın əhəmiyyətini qeyd edərək bildirib ki, yerlərdə dini radikalizmlə bağlı tədbirlər keçirilir. Abşeron rayonunda 450 mindən çox sakinin yaşadığını, respublikanın bütün bölgələrindən olan insanların burada məskunlaşdığını vurğulayan İ.Gülməmmədova rayon ərazisində dini məsələlərlə bağlı hər hansı bir narahatçılığın olmadığını tədbir iştirakçılarının diqqətinə çatdırıb.
Ümummilli lider Heydər Əliyevin müəyyənləşdirdiyi siyasətin və bu kursun cənab Prezident İlham Əliyev tərəfindən uğurla həyata keçirilməsinin nəticəsində Azərbaycanda sabitliyin olduğunu, dini qarşıdurmaların yaşanmadığını qeyd edən İ.Gülməmmədova bütün ictimaiyyət olaraq sabitliyin qorunması istiqamətində çalışılmalı olduğunu bildirib.
