Hər həftənin şənbə və bazar günləri olmaqla, bu gün də Xırdalan şəhərində kənd təsərrüfatı məhsullarının növbəti satış-yarmarkası kecirilir. Abşeron rayon İcra Hakimiyyətinin təşkilatçılığı ilə reallaşdırılan yarmarka əhalinin gündəlik ərzaq məhsullarına olan tələbatı ödəmək, süni qiymət artımının qarşısını almaq məqsədi daşıyır. Sabah da öz işini davam etdirəcək yarmarkada alıcı və satıcıların rahatlığı üçün hər cür şərait yaradılıb, məhsulların keyfiyyətli olması və qiymətlərin sabitliyi nəzarətdə saxlanılıb.
Abşeron Rayon İcra Hakimiyyətinin başçısının müavinləri Məhəmməd Həsənov, Fuad Cəbrayılov və İlham Quliyev yarmarkaya baş çəkərək alış-veriş üçün yaradılan şəraitlə, məhsulların keyfiyyəti və qiyməti ilə maraqlanıb, həm satıcılarla, həm də alıcılarla söhbət ediblər.
Bildirilib ki, çeşid sayına və qiymətinə görə fərqlənən yarmarkada satışa çıxarılan kənd təsərrüfatı məhsulların dəyəri movcud bazar qiymətlərindən 35-40 faiz aşağıdır. Buraya respublikanın bütün bölgələrindən, o cümlədən Xanlar, Şəmkir, Quba, Xaçmaz, Tovuz, Gədəbəy, Bərdə, Cəlilabad, Biləsuvar, Lənkəran, Masallı və digər rayonlarda yetişdirilən yerli məhsullar gətirilib. 300-dən çox sahibkar, 200-ə yaxın fərdi məhsul istehsalçısı cəlb edilib. Respublikanın ayrı-ayrı rayonlarından gələn fermerlər satışa 400 tona yaxın kənd təsərrüfatı məhsulları çıxarıblar. Yarmarkada müxtəlif növ ərzaq məhsulları, o cümlədən meyvə-tərəvəz, toyuq, süd məhsulları, ət, həmçinin müxtəlif çeşiddə çərəzlər alıcılara təklif olunub.
Piştaxtaya düzülən məhsullar üçün sərfəli qiymət həddi müəyyən edilib. Beləliklə, 1 kiloqram kartof 40-50qəpik, soğan 50 qəpik, kələm 10-20 qəpik, yerkökü 20-25 qəpik, yumurta 9-10 qəpik qiymətində müəyyənləşdirilərək alıcılara təqdim edilir. Növündən asılı olaraq örtülü istixanalarda yetişdirilən pomidorun 1 kiloqramı 1- 1,20 manat, xiyarın 1 kiloqramı 1,30 manat , mal əti 5 manat, qoyun əti 6 manat dəyərində satılır. Almanın qiyməti 50-60 qəpik, mandarin və apelsin isə 1,30 manat civarında müəyyənləşdirilib.