Abşeron Rayon İcra Hakimiyyətinin, Dini Qurumlarla İş üzrə Dövlət Komitəsinin birgə təşkilatçılığı və YAP Abşeron rayon təşkilatı Gənclər Birliyinin təşəbbüsü ilə Mehdiabadda “Multikultralizm və radikal dini cərəyanlar” mövzusunda tədbir keçirilib. Tədbirdə rayon icra hakimiyyətinin dini qrumlarla işin təşkilatçısı Vüqar Bəşirov, Dini Qurumlarla İş üzrə Dövlət Komitəsinin əməkdaşları İsmayıl Çəfərov, Şahlar Məhəmmədov, rayon ağsaqallar şurasının sədri Nadir Ağayev,YAP Abşeron rayon təşkilatı Gənclər Birliyinin sədri Elgün Hümbətov və qəsəbədə yerləşən təhsil müəssisələrinin rəhbərləri, din xadimləri və ziyalılar iştirak ediblər.
Toplantıda dini radikalizm və onun fəsadları barədə çıxış edən V.Bəşirov bildirib ki, bəzi qüvvələrin din pərdəsi altında ölkəmizin ictimai-siyasi sabitliyinə, dövlətimizin hüquqi-demokratik əsaslarına qarşı yönəlmiş pozuculuq fəaliyyətləri müşahidə olunur. O qeyd edib ki, bu cür əməllər törətməyə cəhd edənlərə qarşı dövlət qurumları tərəfindən mübarizə tədbirləri həyata keçirilir.
Sonra Dini Qurumlarla İş üzrə Dövlət Komitəsinin əməkdaşları Çəfər İsmayılov və Şahlar Məhəmmədov çıxış edərək, ölkəmizdəki multikultral və tolerant mühitin təməlində azərbaycançılıq ideologiyasının dayandığını bildiriblər. Diqqətə çatdırılıb ki, Prezident İlham Əliyevin həyata keçirdiyi uğurlu siyasət nəticəsində ölkəmizdə müxtəlif dinlərə etiqad edən insanlar mehriban və qarşılıqlı hörmət şəraitində yaşayır, respublikamız tolerantlıq nümunəsinə çevrilib.
YAP Abşeron rayon təşkilatı Gənclər Birliyinin sədri Elgün Hümbətov mövzunun aktuallığını qeyd edərək, gənclərlə bu səpkili görüşlərin keçirilməsinin çox böyük əhəmiyyətə malik olduğunu vurğulayıb. O,həmçinin qeyd edib ki, radikalizmlə mübarizədə hər bir Azərbaycan vətəndaşı, xüsusilə də gənclər fəal iştirak etməli və bu prosesə öz töhfəsini verməlidirlər.
Rayon ağsaqallar şurasının sədri Nadir Ağayev də dini radikalizmi doğuran səbəblərdən, İslam dünyasında baş verən proseslərdən danışıb. O bildirib ki, radikalizmi doğuran başlıca səbəblərdən biri İslam dini haqqında məlumatsızlıq və yanlış yönləndirilmədir: “İslam dini haqqında bilgiləri zəif olan insanların radikal cərəyanlara, qruplara cəlb edilməsi daha asan olur. Ona görə də dini radikalizmlə mübarizədə ilk növbədə dini maarifçilik işinin təşkilinə xüsusi önəm verilməlidir”.
