Abşeronda “Sosial şəbəkələrdə informasiya təhlükəsizliyi qaydaları” mövzusunda təlim keçirilib. Yeni Azərbaycan Partiyası Abşeron rayon təşkilatı Gənclər Birliyinin təşkilatçılığı ilə Xırdalan şəhər 1 nömrəli tam orta məktəbdə baş tutan təlimdə Abşeron Rayon İcra Hakimiyyəti Aparatının Böyük məsləhətçi - Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Hafiz Mikayılov, YAP Abşeron rayon təşkilatının Gənclər Birliyinin sədri Elgün Hümbətov, İT mütəxəssisi Şamo Əliyev, məktəbin müəllim və şagird kollektivi iştirak ediblər.
İnformasiya təhlükəsizliyi istiqamətində keçirilən maarifləndirici tədbirlərin gənclər üçün çox böyük əhəmiyyət daşıdığını bildirən H.Mikayılov Azərbaycanın müharibə şəraitində olduğunu və bu səbəbədən də yeniyetmələrin internetdə yayılan və yerləşdirilən informasiyalara ehtiyatla yanaşılmasının vacibliyini qeyd edib. Dövlət sirri olan hərbi məlumatların yayılmamasının vacibliyini vurğulayan H.Mikayılovun sözlərinə görə, mediada, internetdə, sosial şəbəkələrdə yayılan informasiyalar milli təhlükəsizliyə zərər yetirməməli, bu kimi informasiyalar cəmiyyətin panik duruma düşməsinə rəvac verməməlidir.
Hazırkı dünyada diqqətdə saxlanmalı ən vacib məsələlərdən birinin informasiya təhlükəsizliyi olduğunu söyləyən E.Hümbətov bildirib ki, demokratik ölkələrdə bu məsələnin tənzimlənməsi üçün müəyyən qanunvericilik bazası formalaşdırılıb. Eləcə də həmin ölkələrdə müxtəlif konsepsiyalar qəbul edilir və bununla da ölkənin informasiya təhlükəsizliyi tənzimlənir. Təhlükəsizlik məsələlərinin Azərbaycan üçün də aktual olduğunu deyən E.Hümbətov əlavə edib ki, informasiya resursları artdıqca milli təhlükəsizliyi təhdid edən məlumatlar da çoxalır.
Sonda Ş.Əliyev “facebook” şəbəkəsində istifadəçiləri gözləyən təhlükələr barədə danışıb, onlardan qorunma mexanizmləri və qarşısını almaq yolları barədə ətraflı məlumat verib.