Abşeron rayonu Qobu qəsəbəsində “Cavanşir” idman sağlamlıq klubunun açılışı olub. Tədbirdə Abşeron Rayon İcra Hakimiyyəti başçısının müavini Fuad Cəbrayılov, Milli Olimpiya Komitəsinin vitse-prezidenti, Ədalətli Oyunlar Komissiyasının sədri Xəzər İsayev, millət vəkilləri Ülvi Quliyev, Adil Əliyev, Gənclər və İdman Nazirliyinin şöbə müdiri Asif Quliyev, Azərbaycan Güləş Federasiyasının yeniyetmələr üzrə vitse-prezidenti, Olimpiya çempionu Namiq Abdullayev, Olimpiya çempionu Zemfira Meftahətdinova,Abşeron rayon Gənclər və idman idarəsinin rəsi Əsgər Əmirəliyev, rayon ictimaiyyətinin və idman təşkilatlarının nümayəndələri iştirak ediblər.
Açılış mərasimində çıxış edən Abşeron Rayon İcra Hakimiyyəti başçısının müavini Fuad Cəbrayılov rayonunun idman həyatında sevindirici bir günun yaşandığını söyləyib. “Cavanşir” idman sağlamlıq klubunun idmançılarımızın istifadəsinə verildiyini vurğulayan F.Cəbrayılov bildirib ki, müstəqil Azərbaycanda dövlətin qarşısında duran tarixi vəzifələrin yerinə yetirilməsi, o cümlədən dövlətçiliyin, iqtisadiyyatın və sosial sahələrin inkişafı və möhkəmləndirilməsi, şəxsiyyətin harmonik inkişafı, gənclərin əməyə və vətənin müdafiəsinə hazırlanması kimi məsələlərin həllinin təmin edilməsində bədən tərbiyəsi və idmanın gündəlik həyatımıza daxil edilməsi hazırkı dövrdə aktual tələblərdən birinə çevrilib: “Bədən tərbiyəsi və idmanın inkişafı ölkənin hərtərəfli inkişafına xidmət edir. İdman ümummilli dəyərdir”.
F.Cəbrayılov vurğulayıb ki, rayon ərazisində şahmat məktəbi inşa edilərək sakinlərin istifadəsinə veerilib. O əlavə edib ki, bundan başqa, müasir standartlara cavab verən idman kompleksi inşa edilir.
Daha sonra Xəzər İsayev, Ülvi Quliyev, Adil Əliyev, Asif Quliyev və digərləri ölkəmizdə idmanın inkişafından, əldə olunmuş uğurlardan danışıblar.
Tədbir incəsənət nümayəndələrinin kanserti ilə davam etdirilib.