Aprelin 15-də Abşeron Rayon İcra Hakimiyyəti və Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin birgə təşkilatçılığı ilə “Multikulturalizm; radikalizmə qarşı mübarizə vasitəsi kimi” mövzusunda Abşeron rayonunun Pirəkəşkül kəndində tədbir keçirilib.
Konfransda Abşeron Rayon İcra Hakimiyyəti başçısı aparatının İctimai-siyasi və humanitar məsələlər şöbəsinin müdir müavini, dini qurumlarla işin təşkilatçısı Vüqar Bəşirov, DQİDK-nın Sumqayıt bölgəsi üzrə şöbənin əməkdaşları – baş məsləhətçi Elnur Kəlbizadə, məsləhətçi Şahlar Məhəmmədov, Rayon Ağsaqqalar Şurasının sədri Nadir Ağayev, YAP Abşeron rayon təşkilatı Gənclər Birliyinin sədri Elgün Hümbətov və kənd sakinləri iştirak ediblər
Tədbiri giriş sözü ilə açan V.Bəşirov Abşeron rayonunda mövcud dini durumla bağlı məlumat verib. Bölgədə dini durumun stabil olduğunu bildirən çıxışçı tədbirin əhəmiyyətini vurğulayıb. Yerlərdə dini radikalizmlə bağlı tədbirlərin keçirildiyini söyləyən V.Bəşirovun sözlərinə görə, Abşeron rayonunda 450 mindən çox sakin yaşayır. Respublikanın bütün bölgələrindən olan insanların burada məskunlaşdığını vurğulayan V.Bəşirov rayon ərazisində dini məsələlərlə bağlı hər hansı bir narahatçılığın olmadığını tədbir iştirakçılarının diqqətinə çatdırıb.
Sonra DQİDK-nın Sumqayıt bölgəsi üzrə şöbənin baş məsləhətçisi E.Kəlbizadə Azərbaycan xalqının əsrlər boyu formalaşan multikulturalizm ənənəsi haqqında məruzə ilə çıxış edib. O, bu dəyərlərin azərbaycanlıların xarakterik xüsusiyyəti ilə bağlı olduğunu bildirib və multikultural mühitin mövcudluğuna dair konkret örnəklərdən danışıb.
Tədbirdə həmçinin çıxış edən Şahlar Məhəmmədov, Elgün Hümbətov və Nadir Ağayev milli mənəvi dəyərlərin təbliği və şagirdlərə ətraflı izah edilməsinin zəruriliyindən danışıblar.
Şamo
