Ailə, Qadın və Uşaq Problemləri üzrə Dövlət Komitəsi tərəfindən əhali, xüsusilə gənclər arasında insan alveri və onun yaratdığı fəsadlara qarşı mübarizə üzrə təbliğat və maarifləndirmə işlərinin gücləndirilməsi istiqamətində mütəmadi olaraq genişmiqyaslı layihələr həyata keçirilir.
Bu istiqamətdə görülən işlərin davamı olaraq, “Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı”nın icrası məqsədilə, “İnsan alverinin qurbanı olma!” adlı genişmiqyaslı maarifləndirmə layihəsinə başlanılıb.
Bu münasibətlə iyulun 26-da Xırdalan şəhərindəki Heydər Əliyev Mərkəzində “İnsan alverinə qarşı mübarizə” mövzusunda maarifləndirmə tədbiri keçirilib.Tədbir Ailə, Qadın və Uşaq Problemləri üzrə Dövlət Komitəsi və Abşeron Rayon İcra Hakimiyyətinin birgə təşkilatçılığı ilə reallaşıb. Layihə çərçivəsində baş tutan tədbirdə gəclər və rayon ziyalılları iştirak ediblər.
Toplantını giriş sözü ilə açan Abşeron Rayon İcra Hakimiyyətinin böyük məsləhətçisi,yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Hafiz Mikayılov tədbir iştirakçılarını salamlayıb, insan alverinin ağır nəticələri, bu ümumbəşəri bəla ilə mübarizənin mahiyyəti və formalarından danışıb. Natiq bu istiqamətdə həyata keçirilmiş təşkilati tədbirləri, insan alverinin doğurduğu fəsadlar, eləcə də ölkəmizdə bu sosial bəlaya qarşı mübarizə metodları barədə ətraflı məlumat verib.
Sonra tədbir iştirakçılarına Komitə tərəfindən keçirilən “Azərbaycan ailəsi” film festivalına təqdim edilmiş insan alveri mövzusunda “Satılmış həyat ” adlı film nümayiş edilib.
Ailə, Qadın və Uşaq Problemləri üzrə Dövlət Komitəsinin Ailə Problemləri şöbəsinin baş məsləhətçisi Rafiq Mahmudov mövzu ilə bağlı təqdimat nümayiş etdirərək, insan alveri ilə mübarizə sahəsində mövcud vəziyyət və mübarizə üsulları barədə məlumatı tədbir iştirakçılarının nəzərinə çatdırıb.
Daha sonra Abşeron rayon Gənlər və İdman idarəsinin rəsi Əsgər Əmirəliyev, Abşeron rayon mərkəzi kitabxanasının müdiri Məlahət Yusifqızı,rayon mədəniyyət mərkəzinin əməkdaşı Çimnaz Qurbanova çıxış edərək insan alveri və onu yaradan səbəblər barədə, insan alveri qurbanlarının əksəriyyətinin gənclər təşkil etdiyindən danışıblar. Çıxış edən natiqlər həmçinin problemin aktuallığını qeyd edərək, insan alveri qurbanları üçün yaradılmış sığınacaqlar, eləcə də onların cəmiyyətə reinteqrasiyası olunmasında psixoloji yardım amilinin əhəmiyyətini vurğulayıblar.
Tədbirin sonunda Komitə tərəfindən müvafiq sahədə rayon üzrə mövcud vəziyyət barədə rəyi öyrənmək məqsədilə hazırlanmış anonim anket sorğular paylanılıb, tədbir iştirakçılarının mövzular ətrafinda sualları cavablandırılıb və iştirakçılara Komitə tərəfindən hazırlanan maarifləndirici çap materialları təqdim edilib.
“İnsan alverinin qurbanı olma!” adlı layihə çərçivəsində tədbirlərin digər şəhər və rayonlarda davam etdirilməsi nəzərdə tutulub.
Şamo Əliyev