21 sentyabr 2016-cı il tarixində “Vətəndaş cəmiyyəti” referendum üzrə təşviqat qrupunun Xırdalan şəhərindəki Heydər Əliyev Mərkəzində Abşeron seçiciləri ilə görüşü keçirilib.Toplantıda rayon mədəniyyət və turizim şöbəsinin müdiri İlham Manafov, AMEA-nın fəlsəfə elmləri doktoru Rəna Mirzəzadə, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının vitse –prezidenti Vüqar Zeynalov ,YAP fəalları, qeyri-hökümət təşkilatlarının rəhbərləri və nümayəndələri, seçicilər iştirak ediblər.
Görüşü İlham Manafov giriş nitqi ilə açaraq referendumöncəsi həyata keçirilən tədbirlər haqqında məlumat verib. Referendumun təbliğat-təşviqat kampaniyası çərçivəsində yaradılan təşviqat qrupularının fəaliyyətindən bəhs edib. Təşviqat qruplarının təbliğatın uğurla aparılması, əhalinin maarifləndirilməsi, seçicilərə Konstitusiya islahatlarının əhəmiyyətinin çatdırılması istiqamətində gördüyü işlərdən danışıb. Bildirib ki, bütün vətəndaşlar, seçicilər Konstitusiya islahatlarının dövlətimizin və millətimizin gələcək inkişaf hədəflərinə istiqamətləndiyini anlamalı və dövlətin ictimai-siyasi həyatında mühüm rolu olan referendumda fəal iştirak etməlidirlər. Referendum vətəndaşlarımıza əlavə hüquq və azadlıqların verilməsi, onların mövcud hüquqlarının daha da möhkəmləndirilməsi istiqamətində mühüm addımdır. İ.Manafov dövlətin və cəmiyyətin inkişaf dinamikasına uyğun olaraq Konstitusiyaya əlavə və dyişikliklər edilməsinin vacibliyini vurğulayıb.
Toplantıda çıxış edən Vüqar Zeynalov 1995-ci ilin 12 noyabrında ölkənin ilk Konstitusiyasının yaranmasından ötən müddət ərzində 2002 və 2009-cu illərdə həyata keçirilən Konstitusiya islahatlarından danışıb. Bütün dövlərdə bunun xalqın istək və arzusundan doğduğunu, bu dəfəki islahatların da məhz cəmiyyətdən gələn bir sifariş olduğunu bildirib. Bu islahatları üç istiqamətdə təhlil edib. Bunların icra strukturlarının fəaliyyətinin daha da təkmilləşdirilməsi, insan hüquq və azadlıqlarının möhkəmləndirilməsi və terminoloji əlavə və dəyişiklikləri əhatə etdiyini söyləyib. Konstitusiyaya təklif edilən əlavə və dəyişikliklərdə dövlət hakimiyyətinin məsuliyyətinin artırılması, idarəçilik mexanizminin möhkəmləndirilməsi və s. kimi mühüm məsələlərin yer aldığını diqqətə çatdırıb.
Görüşdə çıxış edən Rəna Mirzəzadə ölkəmizdə həyata keçirilən gənclər siyasətindən və gənclərimizin inkişafına yönəlmiş mühüm dövlət proqramlarının həyata keçirilməsindən danışıb. Konstitusiyaya təklif edilən əlavə və dəyişikliklərdə gənclərin hüquqlarının artırılmasının prioritet olduğunu qeyd edib. Xüsusilə Konstutusiyada yaş məhdudiyyətinin aradan qaldırılmasının bunun bariz nümunəsi olduğunu və gənclərimizin gələcək inkişafına təkan verəcəyini nəzərə çatdırıb.
Görüş diskussiya şəklində davam etdirilib.
Şamo Əliyev