BOCCİA – mənşəyi İtaliyadan gələn bir idman oyunudur. Bu idman növü 1984-cü ildən Paralimpiya oyunlarına daxil edilib və 20 il ərzində populyarlıq qazanıb. BOCCİA artıq 50 ölkədə tətbiq olunur və sürətlə inkişaf edir.BOCCİA idman növündə bütün ağır kateqoriyalı (uşaq serebral ifliçi, əzələ distrofiyası, beyin travması, dayaq-hərəkət aparatının pozulması) əlillik dərəcəsi olan uşaqlar, gənclər və yaşlılar öz güclərini sınaya bilər.
Turnirin açılış mərasimində çıxış edən Azərbaycan Milli Paralimpiya Komitəsinin (AMPK) prezidenti İlqar Rəhimov AMPK tərəfindən 2013-cü ildən ölkəmizdə boccia idmanının təbliğinə başlanıldığını vurğulayıb. O, boccianın Azərbaycanda sürətlə inkişaf etməsindən, çoxlu sayda fiziki imkanları məhdud gəncin idmanın bu növünə böyük maraq göstərdiyini bildirib.
“SENI” firmasının Mərkəzi Asiya və Qafqaz üzrə əlaqələndiricisi Mixail Kopaç, Abşeron rayon İcra Hakimiyyəti başçısının müavini Fuad Cəbrayılov, Gənclər və İdman Nazirliyinin şöbə müdiri Aydın Məmmədov və boccia üzrə Türkiyə millisinin baş məşqçisi Nihat Yılmaz turnirin əhəmiyyətini yüksək qiymətləndirib, idmançılara uğurlar arzulayıblar.
Çıxışlardan sonra İlqar Rəhimov turniri açıq elan edib.
Artıq ölkəmizdə də kifayət qədər məhşurlaşan bu idman növünə maraq gündən günə artır. Bu ilki turnir Milli Paralimpiya Komitəsinin 20 illiyinə həsr olunub. BOCCİA üzrə 3-cü “SENİ CUP” ümumilikdə 60-a yaxın idmançı olmaqla 9 komanda BC1, BC2, BC3, BC4 və BC5 kateqoriyaları üzrə yarışıblar.
Məlumat üçün bildirək ki,yarış çərçivəsində Abşeron rayonunun “ Abşeron klubu”nu təmsil edən 6 idmançı qalib adını qazanmaq uğrunda mübarizə aparıb.
Gərgin idman mübarizəsi şəraitində keçən turnirdə “Abşeron klubu”nun təmsilçisi Əli Əhmədov mötəbər turnirin bürünc medalına sahib olub.
Daha sonra AMPK-nın prezidenti İlqar Rəhimova Abşeron rayon İcra Hakimiyyəti adından xatirə hədiyyəsi təqdim olunub. Maraqlı mübarizə şəraitində keçən turnirin yekununda tədbirin təşkilatçılığında göstərdiyi dəstəyə görə Abşeron rayon İcra Hakimiyyətinin başçısına təqdim etmək üçün F.Cəbrayılova AMPK adından xatirə diplomu təqdim edib.
Şamo Əliyev