“İrəli” İctimai Birliyinin Gənclər və İdman Nazirliyinin dəstəyi ilə reallaşdırdığı “Azərbaycanın İntellektual BİRincisi” layihəsinin final mərhələsi başa çatıb. Abşeron Rayon Gənclər və İdman İdarəsindən Absheronxeber.Az-a verilən məlumata görə “Azərbaycanın İntellektual BİRincisi” layihəsində 10 regionu, 66 rayonu təmsil edən 1109 gənc iştirak edib. Layihə çərçivəsində Abşeron, İsmayıllı, Sabirabad, Şəki, Lənkəran, Sumqayıt, Mingəçevir, Şəmkir, Quba, Tərtər şəhər və rayonlarının gənc intellektualları region turnirlərində, eyni zamanda, Bakının 11 rayonunun gəncləri “Xəmsə”, “Nə?, Harada?, Nə zaman?”, “Axtar tap”, “Vətəni tanı” intellektual oyunları üzrə yarışaraq layihənin final mərhələsinə vəsiqə qazanıblar.
Bağlanış mərasimində Prezident Administrasiyasının ictimai-siyasi məsələlər şöbəsinin gənclər təşkilatları ilə iş sektorunun müdiri Vüsal Quliyev, gənclər və idman nazirinin müavini İntiqam Babayev, Milli Məclisin gənclər və idman komitəsinin sədri Fuad Muradov, Prezident yanında Gənclər Fondunun icraçı direktoru Fərhad Hacıyev, “İrəli” İctimai Birliyinin sədri Mirhəsən Seyidov, layihənin tərəfdaşı olan Azərbaycan İntellektual Oyunlar Klubunun prezidenti Aydın Piriyev , Abşeron Rayon Gənclər və İdman İdarəsin rəisi Əsgər Əmirəliyev və digərləri çıxış edərək layihənin əhəmiyyətindən danışıblar.
Final mərhələsində iştirak edən rayonumuzun komandası layihə çərçivəsində keçirilən “Nə? Harada? Nə zaman?” və “Xəmsə” bilik yarışmaları üzrə Respublika Çempionu adına layiq görülüb, “Axtar tap” yarışması üzrə isə 2-ci yeri tutub.. Sonra qalib komandalar medallar və qiymətli hədiyyələrlə təltif olunublar.
Xatırladaq ki,Ümummilli lider Heydər Əliyevin xatirəsinə həsr olunmuş, Azərbaycan Respublikası Gənclər və İdman Nazirliyinin və "İrəli" İctimai Birliyinin təşkilatçılığı ilə keçirilən “Azərbaycanın İntellektual Birincisi” layihəsininin “Nə? Harada? Nə zaman?”, “Xəmsə”, “Axtar tap”, “Vətəni tanı” yarışmaları üzrə 3 dekabr 2016-cı il tarixdə Sumqayıt şəhərində keçirilən respublika zona seçim turunda iştirak edən 17 nəfərdən ibarət Abşeron rayon gəncləri bütün yarışlarda qalib gələrək yarışların final mərhələsinə vəsiqə qazanmışlar.
Şamo Əliyev