Bu gün şəhid Qəribov Amil Arif oğlunun doğum günüdür. 1992-ci ilin fevralın 2-də Qarabağ uğrunda gedən döyüşlərdə şəhid olan Amil Qəribovun ad gününü doğmaları və Abşeron rayon Gənclər və İdman İdarəsinin rəisi Əsgər Əmirəliyev və bir qrup gənclər onun doğulub boya-başa çatdığı Qobu qəsəbəsindəki evdə qeyd ediblər.
Ə.Əmirəliyev, Amilin keçdiyi şanlı həyat yolundan, qəhrəmanlığından danışıb. Azərbaycanın azadlığı, ərazi bütövlüyü uğrunda şəhid olan Amil Qəribovun və onun kimi qəhrəman oğullarımızın xatirəsinin əbədi yaşayacağını, daim əziz tutulacağını söyləyib.
Qəsəbə orta məktəbinin direktoru Cəbrayıl Cəfərquliyev çıxış edərək bu kimi tədbirlərin xüsusilə gənclərin hərbi vətənpərvərlik tərbiyəsində mühüm rol oynadığını vurğulayıb. Diqqətə çatdırılıb ki, qobulular tarixin bütün mərhələlərində Vətənə, xalqa, dövlətə sədaqət nümayiş etdirib, Vətən uğrunda canlarını belə əsirgəməyiblər.Qarabağ uğrunda döyüşlərin başlandığı ilk günlərdən qobulular da könüllü cəbhəyə yollanıb, onlardan 21 nəfəri şəhidlik zirvəsinə ucalıb. Bu gün də qəsəbənin hər bir sakini Əli Heydərov kimi oğullarımızın intiqamını almağa hazırdır.
Gənclər öncə şəhid Amil Qəribovun məzarını ziyarət edib, qəbri üstünə tər güllər düzüb, ruhuna dualar oxuyub. Şəhid Amil Qəribovun anası göstərilən qayğı və diqqətə görə dövlətimizdən razılığını bildirib. Daha sonra gənclər şəhid Əli Heydərovun məzarını ziyarət edib və qəbri üstünə gül dəstələri qoyublar. Qeyd olunub ki, Əli aprel döyüşləri zamanı digər şəhidlərimiz kimi böyük şücaətlik göstərib və qəhramancasına şəhid olub. Bu gün gənclər bu cür şəhidləri ilə qürur duyur.
Daha sonra gənclər Amil Qəribovun və Əli Heydərovun ailəsi ilə görüşüb.Valdeyinlərinə minatarlıq bildiriblər.
Qeyd edək ki, 1968-ci il dekabr ayının 17-də Abşeron rayonunun Qobu qəsəbəsində anadan olan Amil Qəribov 1991-ci ilin dekabrın 23-də könüllü olaraq hərbi xidmətə yola düşüb. 1992-ci ilin fevral ayının 2-də Ağdam rayonunda gedən qanlı döyüşlərdə qəhrəmancasına şəhid olub.Məzarı Qobu qəsəbə qəbiristanlığındadır.
Qəsəbədəki küçələrdən birinə şəhid Amil Qəribovun adı verilib.
Şamo Əliyev
