Xırdalan şəhərindəki 15, 17, 24, 26 və 27 nömrəli uşaq bağçalarında Yeni il şənlikləri keçirilib.
15 saylı bağçanın müdiri Mətanət Novruzova çıxış edərək Vətənimiz Azərbaycanın çiçəklənməsindən, inkişafından danışıb.
Qeyd edilib ki, 2016-cü il ölkəmiz, o cümlədən Abşeron rayonu üçün uğurlu il kimi yadda qalıb. Ölkəmiz bu uğurlara vətənpərvər insanların fədakarlığı, işgüzarlığı nəticəsində nail olub.
Daha sonra Şaxta baba və Qar qız maraqlı səhnəciklərlə, oyunlarla uşaqları şənləndiriblər. Rəngarəng kompozisiya ilə davam edən bayram tədbirində uşaqlar şeirlər söyləyib, şən mahnılar və rəqslər ifa ediblər.
17 saylı körpələr-evi uşaq bağçasında balaca fidanlar üçün dünya Azərbaycanlılarının Həmrəylik Günü və yeni il bayramı münasibəti ilə bayram şənliyi təşkil olunub.
Bağçanın müdiri Könül İbrahimova şənlik iştirakçılarını, o cümlədən uşaqları qarşıdan gələn Yeni il münasibəti ilə təbrik edib, onlara sülh və əminamanlıq arzulayıb.
Şaxta baba və qarqızın müşaiyəti ilə keçirilən şənlikdə uşaqların ifasında vətənpərvərlik şerləri və mahınları səsləndirilib, əlvan yolka ətrafında yeni il musiqilərinin sədaları ilə dövrə vurulub, bayramlara həsr olunmuş maraqlı kompozisiyalar nümayiş edilib. Olduqca maraqlı və əyləncəli şəraitdə keçən şənlik uşaqların böyük sevincinə səbəb olub.
24 saylı uşaq bağçasında keçirilən Yeni il şənliyində bağçanın müdiri Leyla Bayramova çıxış edərək balaca fidanları bayram münasibətilə təbrik edib. Bildirib ki, ulu öndər Heydər Əliyevin qurucusu olduğu Azərbaycanda uşaqların vətənpərvər ruhda böyüməsinə xüsusi diqqət göstərilir. O, Heydər Əliyevin Azərbaycançılıq ideologiyasının əhəmiyyətindən danışaraq qeyd edib ki, ən yeni tariximizdə dünya azərbaycanlılarının milli həmrəyliyinə nail olunması Ümummilli Liderimizin adı ilə bağlıdır.
Daha sonra balaca fidanların hazırladıqları müxtəlif rəqs nömrələri, Yeni ilə həsr olunmuş şeirlər, bir neçə xalq nağılı əsasında hazırlanmış səhnəciklər şənliyə xoş ovqat qatıb.
26 saylı körpələr evi-uşaq bağçasında “31 dekabr Dünya Azərbaycanlılarının həmrəyliyi günü” və “Yeni il bayramı” münasibətilə bayram şənliyi keçirilib.
Tədbirdə çıxış edən bağçanın müdiri Nigar Səfərova bildirib ki, ulu öndər Heydər Əliyevin müəllifi olduğu azərbaycançılıq ideologiyası nəinki azərbaycanlıları, ölkəmizdə yaşayan bütün xalqları, dünyada yaşayan soydaşlarımızı vahid ideya uğrunda birləşdirib. Əminliklə demək olar ki, bu gün dünyanın harasında yaşamasından asılı olmayaraq, hər bir azərbaycanlı Azərbaycan dövlətini özünün Vətəni hesab edir və ölkəmizi dünyada təbliğ edir. Azərbaycanlılar öz dövlətinin olmaları ilə qürur duyur və sahibi olduqları ölkəninin inkişafı üçün bütün addımları atır. Bunun nəticəsində də Azərbaycanın dünyanın ən dinamik inkişaf edən ölkələrindən birinə çevrilib.
Uşaqları “31 dekabr - Dünya Azərbaycanlılarının Həmrəyliyi günü” və “Yeni il bayramı” münasibətilə təbrik edən N.Səfərova onlara can sağlığı, sevinc və heç zaman onların simalarından uşaq təbəssümünün, xoşbəxtliyinin əksik olmamasını arzulayıb.
Daha sonra uşaqların ifasında söylənilən Yeni İlə həsr olunmuş şerlər, mahnılar, eləcə də nümayiş etdirilən mili və xarici rəqs nömrələri alqışlarla qarşılanıb.
Tədbirdə şaxta babanın və qar qızın hədiyyələrlə şənliyə gəlməsi, uşaqların bayramını təbrik edərək hədiyyələr paylaması və uşaqlarla rəqs etməsi onların daha da sevincinə səbəb olub. Bayram şənliyinin sonunda uşaqlara Yeni il hədiyyələri verilib.
31 dekabr - Dünya Azərbaycanlılarının Həmrəyliyi Günü və Yeni il münasibətilə Xırdalan şəhərindəki
27 nömrəli körpələr evi-uşaq bağçasında bayram şənliyi keçirilib.
Tədbirdə çıxış edən bağçanın müdiri Samirə Məmmədova uşaqları əlamətdar bayramlar münasibətilə təbrik edib, onlara xoşbəxtlik və firəvan həyat arzulayıb.
Şaxta baba və Qar qız maraqlı səhnəciklərlə, oyunlarla uşaqları şənləndiriblər. Rəngarəng kompozisiya ilə davam edən bayram tədbirində uşaqlar şeirlər söyləyib, şən mahnılar və rəqslər ifa ediblər.
Şənlik xoş əhval-ruhiyyə və əsl bayram ovqatı yaradıb, balacalara əyləncəli anlar yaşadıb. Bayram tədbirində uşaqlara Yeni il hədiyyələri verilib.
Şamo Əliyev