Abşeron rayon Polis idarəsinin təşkilatçılığı, Abşeron rayon İcra Hakimiyyətinin dəstəyi və digər qrumların iştirakı ilə Aşağı Güzdək qəsəbəsində "Narkomaniya ümumibəşər bəladır" " mövzusunda tədbir keçirilib
Tədbir bəşəriyyət üçün getdikcə faciəyə çevrilən narkomaniya və digər zərərli vərdişlərə qarşı mübarizədə hər kəsi fəal olmağa səsləmək, ictimaiyyəti bu sahədə maarifləndirmək məqsədilə keçirilib.
Aşağı Güzdək qəsəbə tam orta məktəbin direktoru Xuraman Kərimova narkomaniya və digər zərərli vərdişlərin cəmiyyətə, ailə dəyərlərinə mənfi təsirini diqqətə çatdırıb, bu ümumbəşəri bəlaya qarşı mübarizədə cəmiyyətin hər bir fərdinin dövlətə dəstək olmasının vacibliyini qeyd edib.
Yığınçaqda çıxış edən Abşeron Rayon Polis İdarəsinin rəis müavini, polis polkovniki Elçin Rəcəbov bildirib ki, hazırda bəşəriyyəti düşündürən və narahat edən ən ağır problemlərdən biri narkomaniyadır. Ölkəmizdə, eləcə də Abşeron rayonunda bu ağır bəlaya qarşı aparılan mübarizədən danışan E.Rəcəbov, narkomanlığın qarşısının alınması ilə bağlı həyata keçirilən tədbirlərə diqqətin artırılmasının vacibliyini vurğulayıb.
Toplantıda “Narkotik vasitələrin, psixotrop maddələrin və onların prekusorlarının qanunsuz dövriyyəsi və narkomanlığın yayılması ilə mübarizə üzrə Dövlət Proqramı”nın icrası məqsədilə Abşeron rayon Polis İdarəsi tərəfindən görülən işlər haqında məlumat verilib.
Tədbirdə çıxış edən Abşeron Rayon İcra Hakimiyyətinin yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Hafiz Mikayılov, Abşeron RPİ-nin İctimai Təhlükəsizlik Şöbəsinin baş inspektoru polis mayoru Elburus Əhmədov, Abşeron Rayon Gənclər və İdman İdarəsinin rəisi Əsgər Əmirəliyev və digər natiqlər gənclər arasında bu kimi zərərli vərdişlərin mənfi fəsadlarından danışblar və bununla bağlı əhali arasında maarifləndirmə işlərinin aparıldığını, mətbuatda məqalələrin dərc edildiyini bildiriblər.Yığıncaqda həmçinin rayondaki təlim-tərbiyə müəssisələrində, məktəblərdə müntəzəm olaraq aidiyyəti təşkilatlarla birlikdə narkotik vasitələrin və psixotrop maddələrin zərərli nəticələri ilə bağlı profilaktik işlərin görüldüyü qeyd edilib.
Sonda narkomaniyanın fəsadları ilə bağlı qısametrajlı film nümayiş olunub, iştirakçılarının təklifləri dinlənilib və onları maraqlandıran suallar cavablandırılıb.
Şamo Əliyev
