Xırdalanda uşaq bağçasında maraqlı Novruz şənliyi – Video

Milli bayramımız, baharın müjdəçisi Novruzu uşaqlar daha çox sevir və gəlişini səbirsizliklə gözləyirlər. Hər il bu əziz bayram şərəfinə təhsil müəssisələrində bir-birindən maraqlı, yaddaqalan mərasimlər təşkil olunur. Bu il də Novruzun gəlişini uşaqlar böyük sevinclə qarşılayırlar.

Rayon bağçalarında novruz bayramına həsr olunmuş silsilə tədbirlər bu qədim və milli bayrama sevginin bu gün də azalmadığının göstəricisidir. Belə tədbirlərdən biri də Xırdalan şəhərindəki 15 saylı uşaq bağçasında keçirilib.

Tədbirin təşkil olunmasında xüsusi rol oynayan bağçanın müdirəsi Mətanət Novruzova çıxış edərək uşaqları, pedaqoji kollektivi, tədbirin digər iştirakçılarını Novruz bayramı münasibətilə təbrik edib, onlara xoş arzularını çatdırıb.

O bildirib ki, Novruz Azərbaycan xalqının ən qədim bayramlarından biridir və əsrlər boyu hər il qeyd olunur: “Milli bayramımız, baharın müjdəçisi Novruzu uşaqlar daha çox sevir və gəlişini səbirsizliklə gözləyirlər. Bu il də Novruzun gəlişini uşaqlar böyük sevinclə qarşılayırlar. Hər il bu əziz bayram şərəfinə təhsil müəssisələrində bir-birindən maraqlı, yaddaqalan mərasimlər təşkil olunur. Bizim bağçamız da uşaqları sevindirmək üçün belə tədbirləri keçirməyi özümüzə borc bildik”.

Al-əlvan geyimli uşaqlar üçün bağçanın həyətində düzənlənmiş mərasimdə çoxlu qonaq və valideynlər də iştirak edirdilər. Bayram şənliyində uşaqların ifasında maraqlı ədəbi-musiqili proqram nümayiş olunub. Novruza, baharın şəninə şeirlər, mahnılar, rəqslər ifa edilib, səhnəciklər göstərilib. Sonra uşaqlar bayram şənliyi üçün hazırladıqları maraqlı ədəbi-musiqili proqramı təqdim ediblər. Şənliyin ən maraqlı anları isə Bahar qızın gəlişi, Kosa ilə Keçəlin çıxışları olub. Onlar öz məzəli sözləri, hərəkətləri ilə uşaqlara sevincli anlar yaşadıblar.

Sonda meydanın ortasında çatılmış tonqal alovlandırıldıqdan sonra bağçanın kollektivi, qonaqlar , milli geyimli qızlar və oğlanlar tonqalın ətrafında dövrə vuraraq yallı gediblər.

Şamo Əliyev