Xəzər dənizindən start götürən Bakı 2017 ümumxalq səyahət turu bugün Abşerona yetişdi. Azərbaycanın 15 bölgəsində baş tutacaq bu tur xalqımıza idman bayramı əhval-ruhiyyəsini bəxş etməklə bərabər, eyni zamanda həmrəylik və sevinc hissini də nəsib edəcək.
Bu əlamətdar günlə əlaqədar bugün səhər ilk olaraq Masazır gölü ətrafında tədbir keçirildi. Abşerondakı Masazır gölü dünyada səkkiz “çəhrayı göl”-dən biri hesab olunur.Onun qeyri-adi rəngi suda və duzun tərkibində yaşayan mikroorqanizimlərlə izah olunur.
Proqramı çərçivəsində Masazır gölü ətrafında baş tutan Su mərasimində Abşeron Rayon İcra Hakimiyyəti başçısının müavini Fuad Cəbrayılov, Abşeron rayon Gənclər və İdman İdarəsinin rəisi Əsgər Əmirəliyev , Sumqayıt Regional Mədəniyyət və Turizm idarəsinin baş məsləhətşisi və Abşeron rayon üzrə nümayəndəsi İlham Manafov, Abşeron Rayon İcra Hakimiyyəti başçısı Aparatının əməkdaşları, idarə, təşkilat və müəssisələrin əməkdaşları da iştirak ediblər.
Su mərasimi, şahmat və rəsm həvəskarı Mirkərəm Bağırlı, karete üzrə Dünya və Avropa çempionatlarının qızıl medal mükafatçısı Sədi Namazov və boks üzrə Dünya Çempionatının qızıl medal mükafatçısı Fərhad Acalov tərəfindən göldən səhəngə su doldurulması ilə nümayiş etdirildi. Su səhəngi axşam Qaradağ rayonunda keçirilən Su festivalında təqdim ediləcək. Qeyd edək ki, Bakıdan səyahətə başlayan səhəng 12 may tarixində Bakı Olimpiya Stadionunda baş tutacaq Açılış Mərasiminin bir hissəsi olacaq.
Tədbiri maraqlı edən daha bir məqam Abşeron Rayon İcra Hakimiyyətinin sifarişi ilə duzdan hazırlanmış labirint üzərində dördüncü İslam Həmrəyliyi Oyunlarının maketi Təşkilat Komitəsi və qonaqlar tərəfindən maraqla qarşılanıb.
Məlumat üçün bildirək ki, Masazır gölü, Azərbaycan Respublikasının Abşeron rayonun ərazisində, paytaxt Bakıdan 21 km şimal-qərbdə yerləşir. Bu göldən 1813-cü ildən başlayaraq mütəmadi şəkildə duz hasil olunur. Masazır gölünün uzunluğu 4.7 km, ortalama eni 2.1 km, ümumi sahəsi 10 km2-dir. Gölün dərinliyi 0.2 metrdən 3 metrə qədərdir. Masazır duz gölündə duz iki vəziyyətdə mövcuddur: gölün dibində olan duz layı şəklində və gölün suyunun tərkibində məhlul şəklində. Göl suyunda NaCl miqdarı 270 gr/litrdir, göl suyunun ümumi mineralizasiyası 330 gr/litrdir. Masazır gölünün cəmi duz ehtiyatı 1.735.000 tondur. Bu göl qırmızıya boyanan görüntüsü ilə yalnız xoş təəssürat yaradan mənzərə deyil, həm də bir çoxları üçün təbiətin verdiyi çörək ağacıdır
Su festivalından aldığı sevinc hislərini Abşeron Xəbərin -ın müxbiri ilə bölüşən rayon İcra Hakimiyyətinin əməkdaşı Seymur Qasımov ürək sözlərini belə ifadə edib: “Biz gənclər Xəzərdən başlayan su səyahətinin tarixi anlarını doğma Abşeronda yaşadığımız üçün qürur hissi keçiririk. “Bakı-2017” IV İslam Həmrəyliyi Oyunlarının su səyahətinin Abşeronda davam etdirilməsi rayonumuz üçün unudulmaz bir hadisədir. İki il əvvəl birinci Avropa Oyunlarının, bu il isə IV İslam Həmrəyliyi Oyunlarının Azərbaycanda keçirilməsi ölkəmizin bu cür möhtəşəm tədbirlərə ən yüksək səviyyədə ev sahibliyi etmək qüdrətindən xəbər verir. İnanırıq ki, IV İslam Həmrəyliyi Oyunları həmrəylik, birlik, sağlam və ədalətli rəqabət ruhunda keçəcək”.
IV İslam Həmrəyliyi Oyunlarının Azərbaycanda keçirilməsindən qürur duyduğunu bildirən Abşeron rayon Gənclər və İdman İdarəsinin rəisi Əsgər Əmirəliyev sevinc hislərini Abşeron Xəbər-in müxbiri ilə bölüşərək deyib: “Azərbaycan möhtəşəm idman bayramı ərəfəsindədir. Bakının bu Oyunlara ev sahibliyi etməsi ölkəmizin dünyada artan nüfuzunun, sosial-iqtisadi inkişafının göstəricisidir. Sevinirəm ki, Xəzərdən başlayan su səyahəti doğma Abşeron rayonuna da yetişdi. Əminik ki, bu möhtəşəm idman bayramı da yüksək səviyyədə keçəcək və ölkəmiz daha bir tarixi uğura imza atacaq”.
Şamo Əliyev
