1 İyun – Uşaqların Beynəlxalq Müdafiəsi Günü münasibətilə Xırdalan şəhər 1 nömrəli tam orta məktəbin VII sinif şagirdləri rayon icra hakimiyyəti başçısının müavini Fuad Cəbrayılov və təhsil şöbəsinin müdir əvəzi Pərviz Əhmədovla görüşüblər. F. Cəbrayılov bu günün əhəmiyyətini qeyd edərək bildirib ki, 1 iyun bütün dünyada Uşaqların Beynəlxalq Müdafiə Günü kimi qeyd olunur. Bu, təsadüfi deyil, çünki müasir dövrdə uşaqların problemlərinin həlli, uşaq hüquqlarının qorunması ən aktual vəzifələrdən biridir. Uşaqların yüksək qayğı ilə əhatə olunması, əlverişli mənəvi və sosial mühitdə böyüməsi üçün zəruri şəraitin yaradılması, hərtərəfli şəxsiyyət və layiqli vətəndaş kimi formalaşması əsası ümummilli lider Heydər Əliyev tərəfindən qoyulmuş dövlət uşaq siyasətinin prioritet istiqamətlərindən birini təşkil etdir.
Son illər uşaqların təlim-tərbiyəsinin daha da təkmilləşdirilməsi istiqamətində mühüm tədbirlər həyata keçirildiyini qeyd edən Başçının müavini – İctimai-siyasi və humanitar məsələlər şöbəsinin müdiri vurğulayıb ki, Prezident İlham Əliyev və Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı, Azərbaycan Respublikasının Birinci vitse-prezidenti və vitse-prezidenti Mehriban Əliyeva uşaqların problemlərinə böyük diqqətlə yanaşırlar. Heydər Əliyev Fondu tərəfindən uşaqların hərtərəfli inkişafı, keyfiyyətli təhsil, yüksək standartlara cavab verən tibbi xidmətlərlə təmin olunması istiqamətində önəmli layihələr həyata keçirilir. Uşaq problemlərinin həlli sahəsində həyata keçirilmiş işlər sırasında qanunvericiliyin təkmilləşdirilməsi istiqamətində atılmış addımları xüsusilə qeyd edib. Azərbaycan Respublikasının 1992-ci ildə BMT-nin Uşaq Hüquqları haqqında Konvensiyasına qoşulması bu sahədə ümumbəşəri normaların ölkəmizdə həyata keçirilməsinə zəmin yaradıb. F. Cəbrayılov birinciləri təbrik edərək onlara uğurlar arzuladı.
Rayon təhsil şöbəsinin müdir əvəzi Pərviz Əhmədov şagirdlərə dərslərində müvəffəqiyyətlər diləyərək, ölkəmizdə uşaqların təhsil alması üçün hər bir şəraitin yaradıldığını vurğulayıb.
Sonda şagirdləri maraqlandıran suallar cavablandırılıb.
Görüşdə şagirdlər həm məktəbdəki uğurlarından, həm də məktəbdənkənarda əldə etdikləri nailiyyətlərdən söz açıblar. Qarşılıqlı söhbət əsnasında keçən görüşdə onlar gələcək planları, maraqlandıqları ixtisaslardan danışıblar. Daha sonra şagirdlər məktəbdə həyata keçirtmək istədikləri layihələr haqqında məlumat veriblər.
