15 sentyabr - Bilik günü Abşeron rayonunun bütün ümumtəhsil məktəblərində tədbirlər keçirilib. Tədbirlərdə rayon icra hakimiyyətinin başçısı İradə xanım Gülməmmədova, qəsəbənin ictimayyət nümayəndələri, müəllim və şagird kollektivləri, valideynlər iştirak ediblər.
Belə tədbirlərdən biri də Abşeron rayon Mehdiabad qəsəbə 4 saylı tam orta məktəbində təşkil olunub. Əvvəlcə Azərbaycan Respublikasının dövlət himni səsləndirilib.
Tədbirdə Bilik günü münasibətilə təbriklər səsləndirilib. Bildirilib ki, Azərbaycan xalqının ümummilli lideri Heydər Əliyev təhsilin inkişafına, müəllimlərə həmişə böyük diqqət və qayğı ilə yanaşıb, bu işi dövlət siyasətinin mühüm bir sahəsi hesab edib. Bu siyasət hazırda Prezident İlham Əliyevin rəhbərliyi ilə uğurla reallaşdırılır.
Qeyd edilib ki, təhsil müəssisələrində çalışan işçilərin əmək haqlarının və tələbələrin təqaüdlərinin artırılması haqqında Azərbaycan Respublikası Prezidentinin sərəncamları, Heydər Əliyev Fondunun “Yeniləşən Azərbaycana yeni məktəb Proqramı” və digər bu kimi tədbirlər dövlətimizin təhsil sahəsinə göstərdiyi diqqətin bariz nümunəsidir. Məktəbin direktoru çıxış edərək Elnurə Cavadzadə rayon rəhbərliyinə öz təşəkkürünü bildirdi.
Tədbirin sonunda "İlk zəng" vuruldu, birincilər sevinclə siniflərinə ilk addımlarını atdılar.
