Bu gün öz nizam-intizami, səliqəsi ilə tanınan 23 saylı körpələr-evi uşaq bağçasında uşaqların həm əylənməsi, həm də öyrənməsi üçün yol hərəkəti qaydalarının təbliğinə həsr edilmiş rus dilində maarifləndirici məşğələ keçirilib.
Məşğələdə 20-dan çox uşaq, Abşeron RİH-in əməkdaşı Elnarə Umayeva, müəllim və valideynlər iştirak edib.
4-5 yaşlı uşaqlar müxtəlif səhnəciklər, şeirlər, mahnılarla yol hərəkətinə aid biliklərini nümayiş etdiriblər. Körpə fidanlar zalda yol nişanları ilə düzəldilmiş “şəhər küçələrində” qaydalara əməl etməklə maşın, velosiped sürüblər. "Açıq məşğələ"də uşaqlara yol hərəkətinə aid suallar verilib.
Elnarə Umayeva çıxışında "açıq məşğələ"nin yüksək səviyyədə keçdiyini, bu gün yol hərəkəti ilə bağlı təbliğat işinin rayonun digər bağçalarında da aparılmasının vacibliyini bildirib. RİH rəsmisinin sözlərinə görə, uşaqlar elə bağça yaşlarından yol hərəkəti qaydalarını öyrənərsə, böyüdükçə bu biliklər onlara həyatda faydalı olacaq.
Bağçanın müdirəsi Aybəniz Sadıxova bildirib ki, azyaşlı uşaqların yol hərəkəti qaydaları ilə bağlı bilikləri qısa müddətdə qavrayıb səhnəciklər göstərə bilməsi çox maraqlı və təəccüblüdür: "Biz bu "açıq məşğələ"yə qısa zaman ərzində hazırlaşdıq. Lakin gördüyünüz kimi, uşaqlar yaxşı hazırlaşıblar və həvəslə də öyrənirdilər".
Şamo Əliyev