Xırdalan şəhər 1 saylı uşaq bağçasında Savad təlimi üzrə açıq məşğələ keçirildi
Tarix:10-11-2017, 21:39
11.10.2017-ci il tarixində bağçanın məktəbəhazırlıq qrupunda Savad təlimi üzrə açıq məşğələ keçirildi.
Açıq məşğələdə Abşeron rayon İcra Hakimiyyəti başçısının müavini Fuad Cəbrayılov, rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov, Abşeron RİH başçısının Хırdalan şəhər inzibati ərazi dairəsi üzrə nümayəndəsi Rafiq Yusubov, Xırdalan bağçalarının müdirələri, 1 saylı bağçanın işçiləri və uşaqlar iştirak edirdilər.
Önçə Abşeron RİH başçısının müavini Fuad Cəbrayılov bağçanın ikinci korpusunda əsaslı təmirdən sonra görülən işlərlə tanış oldu.
Bağçanın musiqi zalında baş tutan tədbiri açıq elan edən məktəbəqədər təhsil müəssisəsinin müdiri Vüsalə Məşədiyeva uşaq bağçasında yaradılan şəraitə görə bağçanın körpə fidanları və onların ailələr adından rayon rəhbəri İradə Gülməmmədovaya minnətdarlıq etdi. V.Məşədiyeva bildirdi ki, bu gün bağçamızın yenidən əsaslı təmir olunaraq istifadəyə verilməsi hər bir valideyinin və uşaqların böyük sevincinə səbəb oldu.
Sonra Azərbaycan Respublikasının üçrəngli bayrağı körpə fidanlar tərəfindən səhnəyə gətirildi. Musiqi sədaları altında zala daxil olan uşaqlar tədbir iştirakçılarını salamladıqdan sonra məşğələ başladı.
Savad təlimi üzrə məşğələni tərbiyəçi Mətanət Rzayeva və musiqi rəhbəri Dürdanə Nəsibova tədris edirdilər. Savad təlimi məşğələsində “«B» səsi və hərfi” tədris edilib. Məşğələdə uşaqlar tanış olduqları hərflər üzrə tapşırıqlar icra edərək biliklərini nümayiş etdirdilər.
Sonda "Açıq məşğələ"nin dinləyicilərindən Fuad Cəbrayılov çıxış edərək "açıq məşğələ"nin yüksək səviyyədə keçdiyini, savad təlimi ilə bağlı bağçada uşaqlarla geniş iş aparıldığını, nəticədə onlarda bu sahədə kifayət qədər aydın təsəvvürlər formalaşdığını qeyd etdi, bağçanın rəhbərliyinə, tədbirin təşkilində əməyi olanlara minnətdarlıqlarını bildirdi.
F.Cəbrayılov bağçanın təmirdən sonra istifadəyə verilməsi münasibətilə kollektivi təbrik edərək vurğuladı ki, uşaq bağçaları məktəbəqədər təhsil müəssisəsi və təhsilin ilk pilləsi kimi uşaqların erkən yaş dövründən intellektual, fiziki və psixi inkişafını, istedad və qabiliyyətinin üzə çıxarılmasını, estetik tərbiyəsini təmin edir. Abşeron rayonunda dövlət uşaq siyasətinin tərkib hissəsi kimi uşaqların sağlam böyüməsi istiqamətində lazımi tədbirlər görülür. Uşaq bağçalarının tikilib istifadəyə verilməsi bu tədbirlər sırasında xüsusi yer tutur.