Bərk məişət tullantılarının idarəçiliyinə dair Milli Strategiya çərçivəsində Abşeron sanitar poliqonu üzrə Ətraf Mühitə Təsirinin Qiymətləndirilməsi sənədi hazırlanır. Abşeron Rayonu İcra Hakimiyyətiin təşkilatçılığı ilə bərk məişət tullantılarının idarəçiliyinə dair Milli Strategiya çərçivəsində Abşeron sanitar poliqonu üzrə hazırlanan Ətraf Mühitə Təsirinin Qiymətləndirilməsi sənədi üzrə ilkin ictimai dinləmələr keçirilib. Dinləmələrdə Abşeron Rayon İcra Hakimiyyətinin Memarlıq və tikinti şöbəsinin müdiri Akif Əliyev, İqtisadiyyat Nazirliyinin nəzdində fəaliyyət göstərən Layihənin İdarəetmə Qrupu, ,Ekologiya və Təbii Sərvətlər Nazirliyinin Abşeron rayon üzrə nümayəndəsi, Mədəniyyət və turizm nazirliyinin Abşeron rayon üzrə nümayəndəsi, qeyri-hökumət təşkilatları, rayonda yerləşən kənd və qəsəbələrdə yaşayan əhali və təşkilatların nümayəndələri iştirak ediblər.
Tədbirdə çıxış edən Abşeron RİH-in baş memarı Akif Əliyev və İqtisadiyyat Nazirliyi nəzdində fəaliyyət göstərən Layihənin İdarəetmə Qrupunun nümayəndəsi ölkədə bərk məişət tullantılarının idarəedilməsi və hazırlanan Milli Strategiya barədə iştirakçılara geniş məlumat veriblər. Vurğulanıb ki, hazırlanan Milli Strategiya bütün ölkə ərazisində bərk məişət tullantılarının idarə edilməsi üzrə toplanma, daşınma və zərərsizləşdirilmə sisteminin təkmilləşdirilməsi, səmərəliliyin artırılması, əlavə xammal bazarının formalaşdırılması, təkrar emal sahələrinin qurulması, təkrar istehsal sahəsində maraqlı olan potensial sahibkarlar və investorlar üçün əlverişli şəraitin yaradılması, dövlət büdcəsindən sahəyə ayrılan subsidiyaların tədricən azaldılması, göstərilən xidmətlərin müqabilində alınan ödənişlərin yığım səviyyəsinin artırılması istiqamətində aparılan işlərin daha da sürətləndirilməsinə təkan verəcəkdir.
Toplantıda iştirak edən Milli Strategiya sənədi hazırlayan məsləhətçi şirkətinin nümayəndəsi poliqonlar üzrə ətraf mühitin qiymətləndirilməsi sənədinin hazırlanmasının əhəmiyyəti və hazırlanma prosesi barədə iştirakçılara ətraflı məlumat verib. Bildirilib ki, Abşeron rayonu ərazisində sanitar poliqonun tikinstisi üçün 75 hektar ərazi nəzərdə tutulmuşdur. 2050-ci ilə qədər poliqona 7,5 milyon ton tullantının gətiriləcəyi planlaşdırılmışdır.
Yığıncağın sonunda fikir mübadiləsi aparılıb və iştirakçıları maraqlandıran suallar ətraflı cavablandırılıb.
Şamo Əliyev
