Dövlət başçımızın imzaladığı sərəncamla rayona icra başçısı təyin edilən İradə Gülməmmədova qısa müddətdə ona göstərilən etimadı doğrultdu. Ən əsası isə icra başçısının gəlişi bütün Abşeronda bayram kimi qarşılandı. Çünki İradə Gülməmmədova Abşeron torpağında yaşayan, və uzun müddət bu rayonda müxtəlif rəhbər vəzifələrdə çalışan, rayonda aparılan quruculuq abadlıq işlərində yaxından iştirak edən bir şəxsdir. İkincisi, İ.Gülməmmədova, bu torpaqların hər qarışına bələd olan insan kimi, onun problemlərinin də nədən ibarət olduğundan xəbərdardı.
İradə Gülməmmədova Abşerona təyinat alan kimi rayonun bütün kəndlərini qəsəbələrini həmçinin məcburi köçkün düşən vətəndaşlarımızın rayonumuzda məskunlaşdığı əraziləri bir-bir qarış qarış gəzdi. Sakinlərin dərdini, sərini, şikayətlərini öyrəndi, problemlərinə yardım əlini uzatdı. Söz olaraq yox, əməli qaydada verdiyi vədləri icra etməyə başladı.
Xatırladaq ki, İradə Gülməmmədova zəngin idarəçilik təcrübəsinə malik olan icra başçılarındandır. Əslən Şuşa rayonundan olan İradə Gülməmmədova Abşeron rayonun problemlərinə hər kəsdən yaxşı bələddir. Bir qədər obrazlı ifadə etsək, onun məxsusi qəbul günü yoxdu, çünki istənilən vətəndaş istənilən vaxt icra başçısı ilə şəxsən görüşə, problemlərini açıq şəkildə ona deyə bilir.
Qapısı camaatın üzünə açıq olan məmur.Ölkəmizin dilbər guşələrindən sayılan Abşeronda son illər gözəl bir ənənə yaranıb: rayon rəhbərliyi hər həftə kənd və qəsəbələrdə əhalinin görüşünə gedir, problemlərlə maraqlanır və müşküllərin operativ həlli üçün tədbirlər həyata keçirir. Bu çevik idarəetmə metodunun tətbiqi sayəsində rayonun sosial inkişafı daha da sürətlənir, gözdən uzaq olan yurd yerlərində belə sakinləri narahat edən məsələlər, necə deyərlər, “saqqal buraxmadan” çözülür. Belə görüşlər həm də tərəflər arasında ünsiyyəti artırır, ortaq məxrəc yaradır, inamı gücləndirir.
Abşeronda həyata keçirilən abadlıq-quruculuq işlərinin böyük bir qismi məhz yerlərdə əhali ilə keçirilən görüşlər zamanı səslənən təkliflərin əks-sədası sayıla bilər. Çünki həmin görüşlərdə qaldırılan məsələlərin az bir qismi şəxsi xarakterli olur, icra başçısı görüşlərə inzibati orqanların, idarə və təşkilatların rəhbərləri ilə bərabər getdiyi üçün qaldırılan şəxsi məsələlər dərhal həll edilir. Adamlar əsasən ümumi səciyyəli problemləri qaldırır, doğma yurdun növrağı üçün təkliflər verirlər. Bu məsələlər də öyrənilib cari fəaliyyət planlarına daxil edilir, ciddi nəzarətdə saxlanır və yubadılmadan həllini tapır.
Onu da deyək ki, İ.Gülməmmədova Abşeronda çalışdığı müddətdə hər bir yaşayış məntəqəsində artıq dəfələrlə səyyar qəbullar keçirib. Deməli, ondan ötrü hər növbəti görüş həm də daha öncə qaldırılmış məsələlərin həlli ilə bağlı hesabat xarakteri daşıyır. Əgər verilən vədlər yerinə yetirilibsə, nəticəyə nail olunubsa, növbəti dəfə də həmin ünvana könül rahatlığı ilə getmək olar. Abşeronun kənd və qəsəbələrində əhali ilə təkrar görüşlərin davamlı olması belə bir qənaət yaradır ki, bu baxımdan üz ağ, alın açıqdır. Görüşlərə həvəslə gedilir: danışmalı söz də var, göstərməli iş də.
Şamo Əliyev
