Xırdalan şəhər 2 nömrəli tam orta məktəbin təşkilatçılığı ilə Abşeron rayonunda fevral ayının 16-da Abşeron rayon İcra Hakimiyyətinin başçısı İradə Gülməmmədovanın , təhsil şöbəsinin nümayəndələrinin, Abşeron Yazıçılar Birliyi, Abşeron rayonunda fəaliyyət göstərən idarə və müəssisələrin əməkdaşları və məktəblilərin iştirakı ilə tanınmış nasir, şair, tərcüməçi, kinodramaturq, Əməkdar incəsənət xadimi, Baba Vəzir oğlu ilə görüş keçirildi.
Əvvəlcə tədbir iştirakçıları Heydər Əliyev Mərkəzində ümummilli liderin büstü önünə gül dəstələri qoyub, xatiarəsinə ehtiramlarını bildirdilər.
Dövlət Himninin səsləndirilməsi ilə başlan tədbiri açıq elan edən məktəbin direktoru Ədalət Camalova tədbir iştirakçıları və qonaqları salamladı.
Qeyd etdi ki, belə görüşlər ədəbi mühitin inkişafına, şagirdlərin şeirə, bədii ədəbiyyata marağının artırılmasına, mütaliə mədəniyyətinin yüksəlməsinə, dünyagörüşlərinin əhatəli olmasına və yazıçılarla oxucuların ünsiyyətinin daha da sıxlaşmasına xidmət edir. Ə.Camalova onu da qeyd etdi ki, Baba Vəziroğlu özünəməxsus yaradıcılıq üslubuna, dəst-xəttə malik bir qələm sahibidir. Oxucular onun əsərlərini həvəslə, maraqla oxuyurlar. Onun poeziyasında vətənə, xalqa, torpağa bağlılıq, sevgi – məhəbbət, saf, təmiz hisslər üstünlük təşkil edir. O, xüsusilə mahnı yaradıcılığı sahəsində səmərəli fəaliyyət göstərir.
Görüşün aparıcıları Pərvanə Nəzərova , Böyükxanım Bünyatova şairin həyat və yaradıcılığı haqqında ətraflı məlumat verdilər. Görüş boyu şairə maraqlı suallarla müraciət etdilər.
Görüşdə həmçinin məktəbin şagirdlərinin iştirakı ilə hazırlanmış, şairin həyat və yaradıcığından bəhs edən videoçarx nümayiş etdirildi.Azərbaycan Yazıçılar Birliyindən hazırlanan videoçarx da şairin və tamaşaçıların marağına səbəb oldu.
Məktəbin şagirdlərinin ifasında şairin “Taleyimdən keçən gün”, “Nəyi gözləyirsən”, “Kim bilir”, “Bu axşam”, “Hava”, “Gözüm səni axtaracaq”, “Dəniz”, “Xatirələr” şeirləri səsləndi.
Respublikanın tanınmış incəsənət ustaları Rəşad İlyasov, Elariz Məmmədoğlu, Yusif Mustafayev, Zeynəb Dostəliyeva, Bilal Əliyev, Təranə Vəlizadə, Günay Kərimova, Elşad Qarabağlı və xanəndə Zakir Əliyevin canlı ifasında şairin sözlərinə yazılmış mahnılar dinləyicilərin zövqünü oxşadı və sürəkli alqışlarla qarşılandı.
Oxucuları qarşısında bədii hesabat xarakterli çıxışı və söylədiyi yeni şeirləri ilə alqışlar qazanan Baba Vəziroğlu görüş iştirakçılarının sevimli şairə ünvanladığı çoxsaylı sualları da cavablandırdı.
Tədbirdə şairi bir daha ürəkdən salamlayan və yaradıcılığında yeni-yeni uğurlar arzulayan Abşeron rayon Təhsil Şöbəsinin müdiri Nazilə Məmmədova belə görüşlərin keçirilməsinin vacib olduğunu bildirərək tədbirin təşkililndə böyük əməyi olan məktəbin direktoru Ədalət Camalovaya təşəkkürünü bildirdi.
Görüşdə Baba Vəziroğlu tədbirin bütün təşkilatçılarına, həmçinin Abşeron rayon İcra Hakimiyyətinin başçısı İradə Gülməmmədovaya təşəkkürünü bildirərək, bir neçə şeirini tədbir iştirakçılarına ərməğan etdi.
Şairin kətan üzərində işlənmiş portretinin, görüşdən xatirə olaraq özünə hədiyyə edilməsini, Baba Vəziroğlu məmnunluğunu ifadə edərək, yüksək qiymətləndirdi.
Tədbirin sonunda Baba Vəziroğlunun sözlərinə bəstələnmiş “Məndən bir də olmayacaq” mahnısının sədaları altında, məktəbin şagirdləri ağ geyimdə zala daxil oldular. 20-dən artıq oğlan və qızlar səhnənin qarşısında və zal boyu vals nümayiş etdilər.
Şamo Əliyev
