“Yanar dağ” Dövlət tarix-mədəniyyət və təbiət qoruğunda “Od çərşənbəsi” bayramı keçirilib. Martın 6-sı xalq təqvimi ilə boz ayın axır çərşənbələrindən ikincisi, Od çərşənbəsi idi. Adət-ənənəyə görə, bu gün tonqal qalayıb, alovun üzərindən tullanmaqla daxildə olan bütün çirkabı və azar - bezarları yandırırlar. Odun, tonqalın olması istiliyin mənasını ifadə edir və yazın gəlişi də havaların isinməsinin əsas göstəricisidir.
Azərbaycan xalqının mədəni irsinin, folklorunun, adət-ənənələrinin qorunması və təbliğində Novruz bayramının böyük əhəmiyyətini nəzərə alaraq, artıq yeddinci ildir ki, "Yanar dağ" Dövlət tarix-mədəniyyət və təbiət qoruğunda bayram şənlikləri keçirilib.
Bahar bayramı Novruza və “Od çərşənbəsi”nə həsr olunmuş şənlikdə Abşeron rayonunun mədəniyyət şöbəsinin, uşaq musiqi məktəblərinin kollektivləri ədəbi-bədii proqramlarla çıxış ediblər.
Tədbirdə milli rəqslər və mahnılar səslənib, eyni zamanda nağara, qarmon və saz çalanlar ansanblı öz çıxışları ilə tamaşaçıları əyləndiriblər.
Bayram şənliyində qoruğa gəlmiş xarici ölkə turistləri bu el şənliyinə qatılıb birlikdə iştirakçılar ilə “Yallı” rəqsi ediblər.
Abşeron rayonu Məmmədli ,Digah kənd sakinlərinin və qonaqların iştirak etdiyi təntənəli tədbirdə milli adət-ənənəmizə uyğun olaraq qonaqlara və turistlərə xonçalarda milli Novruz şirniyyatları paylanılıb, çay süfrələri təşkil edilib.
Şənlikdə təxminən 450 nəfər qonaq iştirak edib.
Şamo Əliyev