Abşeron rayon İcra Hakimiyyətinin başçı İradə Gülməmmədova Abşeron rayonunun Qobu qəsəbəsindəki “İmam Hüseynin Cümə məscidi” ndə yaradılan şəraitlə tanış olub. Məscidin axundu sakinlər adından rayon rəhbərini salamlayaraq Abşeron RİH-in dəstəyi ilə Qobu qəsəbəsində böyük abadlıq və quruculuq işlərinin görüldüyünə görə təşəkkürünü bildirib.
Məsciddə yaradılan şəraitlə tanış olan icra başçısına məlumat verilib ki, ibadətgahın təməli 1987-ci ildə qoyulub, sonralar məscid qəzalı vəziyyətə düşdüyündən, yeni binasının tikintisinə 2003-cü ildə başlanılmışdı. Məscidin yeni binasında dini ayinlərin icra olunması, insanların rahat ibadət etmələri üçün hər cür şərait yaradılıb. Burada eyni vaxtda 400 insan ibadət edə bilər. Bundan əlavə, ərazidə 200 nəfərlik mərasim zalı yaradılıb.
İ.Gülməmmədova məscidin mərasim zalında yaradılan şəraitlə də tanış olub.
Müqəddəs Ramazan ayı münasibətilə xalqımızı təbrik edən rayon rəhbəri son illər Azərbaycanda həm dövlət, həm də Heydər Əliyev Fondu tərəfindən yüzlərlə məscidin tikildiyini bildirib. Azərbaycanda dini-mənəvi dəyərlərin qorunmasına hər zaman yüksək diqqət göstərildiyini vurğulayan İ.Gülməmmədova qeyd edib ki, həm ümummilli lider Heydər Əliyevin hakimiyyəti illərində, həm də Prezident İlham Əliyevin rəhbərliyi ilə xalqımızın dini-mənəvi dəyərlərinin qorunması və inkişafı diqqət mərkəzində saxlanılıb.
Xanım başçı çıxışında onuda qeyd edib ki, 2017-ci ilin ölkəmizdə “İslam Həmrəyliyi İli” elan olunması, Cocuq Mərcanlıda Şuşa məscidinin oxşarının inşa olunması, cənab prezidentin Prezident seçkilərindən dərhal sonra Hacı Cavad məscidinin açılışında iştirakı, dindarlarla görüşü ölkəmizdə İslam dəyərlərinə böyük önəm verilməsini bir daha təsdiq edir.
Sonda icra hakimiyyətinin başçısına Qurani-Kərim hədiyyə olunub.
Şamo Əliyev
