Dövlət himninin ifa olunması ilə başlayan tədbirdə aparıcılar mərasim iştirakçılarını salamlayıb onbirinciləri məzun olmaları münasibəti ilə təbrik ediblər.
Ümummilli liderimiz Heydər Əliyevin təhsilə, gənclərə göstərdiyi diqqət və qayğıdan danışan məktəbin direktoru Ədalət Camalova möhtərəm Prezidentimiz İlham Əliyevin rəhbərliyi altında ölkədə aparılan islahatları yüksək qiymətləndirərək məzunlara bu imkanlardan maksimum dərəcədə faydalanmağı tövsiyə edib.
Ə.Camalova qeyd edib ki, tədris ilində 11-ci sinfi 219 şagird bitirib. Bunlardan 135 nəfəri Azərbaycan, 84 nəfəri isə rus bölməsindədir. Ali məktəbə qəbul imtahanının 1-ci mərhələsində məktəbin 11 şagirdi 600-dən çox bal toplayıb.
Abşeron Rayon İcra Hakimiyyəti başçısının müavini Fuad Cəbrayılov ölkəmizdə təhsilin inkişafı istiqamətində görülən işlərdən və bu sahədə rayonda həyata keçirilən layihələr barədə danışıb, müstəqil həyata qədəm qoyan məzunlara uğurlar arzulayıb.
Ölkədə təhsilə göstərilən dövlət qayğısının ilbəil artdığını vurğulayan F.Cəbrayılov məzunların hər birinin müstəqil Azərbaycanın vətəndaşı olaraq ölkəmizin gələcək inkişafı naminə həyata keçiriləcək işlərdə fəal iştirak edəcəklərinə inandığını bildirib.
Sonra dərs ili boyu qazandığı uğurları və təlim-tərbiyə sahəsində yüksək göstəriciləri ilə fərqlənmiş şagird və müəllimlərə mükafat və diplomlar təqdim edilib.
Tədbirdə çıxış edən müəllimlər məzunlara enişli-yoxuşlu həyatda daim məğrur olmağı, vətənə, millətə sədaqətlə xidmət etməyi tövsiyə ediblər, onlara gələcək həyatlarında uğurlar arzulayıblar.
“Son zəng” tədbirində məktəblilərin ifasında müxtəlif rəqs nömrələri və mahnılar səsləndirilib.
Sonda son zəng çalınıb.
Məlumat üçün bildirək ki, məktəbdə 4560 nəfər şagirdin təlim-tərbiyəsi ilə 450-ə yaxın müəllim məşğul olur. Məktəbin IX siniflərini 303 (204 nəfəri Azərbaycan, 99 nəfəri isə rus bölməsi ), I sinifilərini isə 543 uşaq bitirir (328 nəfəri Azərbaycan, 215 nəfəri isə rus bölməsi). Növbəti tədris ilində isə 491( 269 nəfəri Azərbaycan, 222 nəfəri isə rus bölməsi) uşağın məktəbli olacağı gözlənilir.