Təbiətin keşiyində durmaq, onu qorumaq hər kəsin müqəddəs borcudur. Bu gün Abşeron rayonunda ətraf mühitin mühafizəsi, insanların sağlam ekoloji mühitdə yaşaması və yaşıllıqların genişləndirilməsi istiqamətində ardıcıl tədbirlər görülür. Hər il Abşeronun kənd və qəsəbələrində yüz hektarlarla yeni yaşıllıq zolaqları, meyvə bağları salınır.
Abşeron rayon İcra Hakimiyyəti Başçısının tapşırığına əsasən Abşeron rayonunun kənd və qəsəbələrində növbəti iməçilik aksiyasına başlanılıb.
Rayonun Mehdiabad-Novxanı kəndlərində avtomobil yolunun kənarlarında salınmış yaşıllıq sahələrində keçirilən iməcilikdə Abşeron Abşeron RİH-in müavini İlham Quliyev ilə yanaşı, Abşeron rayon İxtisaslaşdırılmış Təmir-Abadlıq İdarəsinin, bələdiyyələrin ümumilikdə 70-ə yaxın nümayəndəsi iştirak edib.
Aksiyada adı çəkilən ərazilərdə mövcud olan yaşıllıq sahələrində mövsümi budama işləri aparılır, quru ağaclar təmizlənir, çoxillik güllərə qulluq göstərilir, əkilən güllərin alağı təmizlənir, suvarılır, ərazi quru ot və alaqlardan təmizlənir, ərazidə olan çəmənliklərə gübrə verilir. Eyni zamanda ərazidə mövcud olan çəmənlik və ağacların suvarılması, qurumuş ağacların vaxtında ərazidən götürülməsi, çəmənliklərin biçilməsi, ağac və kollarda yaşıl budamanın aparılması işləri həyata keçirilib.
İməcilik zamanı ərazilər ətraf mühit, insan sağlamlığı üçün zərərli olan müxtəlif məişət və polietilen tullantılarından təmizlənib. Toplanan məişət tullantıları xüsusi nəqliyyat vasitələri ilə ərazilərdən daşınıb.
Məlumat üçün bildirək ki, Abşeron rayon icra hakimiyyəti başçısının tapşırığına əsasən hər həftənin şənbə və bazar günləri rayonda iməciliklər keçirilir.
Şamo Əliyev
