Abşeron rayon İcra Hakimiyyətində Abşeron rayon ictimaiyyətinin nümayəndələri ilə görüş keçirilib. Toplantıda Abşeron rayon İcra hakimiyyətinin başçısı İradə Gülməmmədova, rayonun hüquq mühafizə orqanlarının rəhbərləri, rayonun ziyalı nümayəndələri, təhsil, səhiyyə, mədəniyyət işçiləri, rayonun kənd və qəsəbə ərazi icra nümayəndələri, bələdiyyə sədrləri və rayon ictimaiyyətinin nümayəndələri iştirak ediblər.
Görüşü rayon icra hakimiyyətinin başçısı İradə Gülməmmədova açaraq qeyd edib ki, respublikamızda aparılan uğurlu sosial-iqtisadi siyasət nəticəsində ölkənin digər bölgələri kimi Abşeron rayonunun da hərtərəfli inkişafı üçün böyük işlər görülüb və bu işlər hazırda yüksək əzmlə davam etdirilir. Ölkənin hər yerində yaşanan tərəqqi rayonumuzun simasında da aydın müşahidə olunur, deyən başçı son illərin real mənzərəsi Abşeronun ölkənin əsas inkişaf və quruculuq ünvanlarından biri olduğunu vurğulayıb
Son illərdə rayonda görülən işlərdən və görülməsi nəzərdə tutulan işlərdən danışan xanım başçı bildirib ki, Abşeron rayonu qədim ənənələrə, qədim köklərə malik bir rayondur. Bu gün rayonumuzun 500 min nəfərdən artıq əhalisi var. Rayonumuz həm kənd təsərrüfatı rayonu kimi, həm də sənaye rayonu kimi inkişaf edir və öz əhalisinə xidmət göstərir. Rayonumuzda istər təhsil, istər səhiyyə, istər mədəniyyət sahəsində, istərsə də digər sahələrdə infrastruktur sürətlə inkişaf edir, böyük quruculuq işləri aparılır. Bütün bu işlər cənab prezidentin göstərişi əsasında həyata keçirilir.
Cənab prezidentin sərəncamı ilə “Azərsu” ASC-yə maliyyə ayrılıb, həmin maliyyə əsasında artıq Xırdalanda iki il müddətində böyük bir su-kanalizasiya sistemi çəkilir. Su-kanalizasiya xətləri çəkilərkən yollarda müəyyən qazıntı işləri aparılmalı olur. Layihə başa çatdırıldıqdan sonra həmin küçələrin abadlıq işləri də həyata keçiriləcək. Ona görə də, şəhərin müəyyən küçələrində, prospektlərində qazıntı işləri aparılır. Su və kanalizasiya xətlərinin çəkilişi hissə-hissə davam etdirildikdən sonra, harada işlər yekunlaşıbsa həmin yerlərdə abadlıq işləri aparılır. Bu çox böyük bir layihədir, hətta deyərdim ki, Xırdalan üçün tarixi bir hadisədir. Gələcəkdə əhali üçün böyük bir üstünlük olacaq.
İcra başçısının sözlərinə görə, bu, cənab prezidentin Abşeron əhalisinə böyük diqqət və qayğısının nəticəsidir: “İşıqla bağlı da əvvəllər müəyyən problemlərimiz var idi, gərginlik çox aşağı idi. Artıq dörd yarımstansiya tikilib. Xırdalanda, Masazırda, Qobuda, Aşağı Güzdək ərazisində tikilib istifadəyə verilib. Yeni tikilən yarımstansiyaların sayəsində əhalinin elektriklə təminatındakı problemlər aradan qalxacaq”.
Daha sonra görüşdə iştirak edən rayon ictimaiyyətinin nümayəndələri, ağsaqqal və ziyalılar da öz çıxışlarında ölkənin ictimai-siyasi həyatında baş verən hadisələrdən, ölkədə həyata keçirilən nəhəng infrastruktur layihələrindən söz açaraq mədəniyyət, elm, təhsil və digər sahələrin işçilərinə ölkə rəhbərliyi səviyyəsində göstərilən diqqət və qayğıya görə ölkə Prezidenti cənab İlham Əliyevə, Abşeron rayonunda həyata keçirilən işlərə görə İcra Hakimiyyəti başçısı İradə Gülməmmədovaya təşəkkür və minnətdarlıqlarını bildiriblər.
Şamo Əliyev