Bu gün Abşeron rayon İcra Hakimiyyətinin başçısı İradə Gülməmmədova “Qarabağ qaziləri” amputant futbol federasiyasının nümayəndə heyəti ilə görüşüb. Görüşdə Qaziləri qardaş ölkə Türkiyədə qazandıqları uğura görə təbrik edən xanım başçı ölkəmizin ərazi bütövlüyünün müdafiəsi uğrunda döyüşlərdə fiziki sağlamlıqlarını itirmiş vətəndaşların sosial müdafiəsinin daim prezident İlham Əliyevin diqqətində olduğunu vurğulayıb, Qarabağ müharibəsi əlillərinə göstərilən dövlət qayğısının daim artmaqda olduğunu deyib.
İ.Gülməmmədova son vaxtlar dövlət başçısının tapşırığı əsasında əlil və şəhid ailələrinin mənzil-məişət şəraitinin yaxşılaşdırılması, müharibə əlillərinin nəqliyyat vasitələri ilə təminatının daha da gücləndirilməsi istiqamətində görülən işlər barədə məlumat verib.
Söhbət zamanı “Qarabağ qaziləri” amputant futbol federasiyasının prezidenti Rövşən Akifoğlu səfərin təşkilinə və görüşə görə qardaş Türkiyəyə minnətdarlığını bildirərək, səfər barədə məlumat verib.
Sonra ehtiyatda olan polkovnik-leytenant Elmar Hüseynov, “Qarabağ qaziləri” adından yüksək qəbula görə Abşeron rayon İcra Hakimiyyətinin başçısı İradə Gülməmmədovaya minnətdarlığını bildirib.
E.Hüseynov qeyd edib ki, oyundan əvvəl Türkiyənin gənclər və idman naziri Mehmet Muharrem Kasapoğlu “Qarabağ qaziləri” amputant futbol komandasının futbolçuları ilə görüşüb.
Bildirilib ki, səfər çərçivəsində “Qarabağ qaziləri” Amputant Futbol Federasiyasının nümayəndələri və milli komandanın üzvləri Türkiyə daxili işlər naziri Süleyman Soylu ilə də görüşüblər. Onlar həmçinin Azərbaycanın ümummilli lideri Heydər Əliyevin Ankaradakı abidəsini və Türkiyə Cümhuriyyətinin banisi Mustafa Kamal Atatürkün Ankarada dəfn olunduğu məqbərəni – Anıtqəbiri ziyarət ediblər.
Sonda komanda üzvləri mükafatlandırılıb.
Xatırladaq ki, komandamız səfər çərçivəsində Türkiyənin veteranlardan ibarət “Türk Silahlı Qüvvələri” amputant futbol komandası ilə yoldaşlıq görüşü keçirib. Oyun 4:4 hesablı heç-heçə ilə başa çatıb.
Şamo Əliyev