Fevralın 1-də Abşeron rayon Heydər Əliyev Mərkəzində “Qarabağ qaziləri” amputant futbol federasiyasının, “ Həmvətənlərə dəstək ” İB-nın təşkilatçılığı və Abşeron Rayon İcra Hakimiyyətinin dəstəyi ilə Gənclər Gününə həsr olunmuş “Gənclər bizim sabahımızdır” adlı elmi praktiki konfrans keçirilib. Əvvəlcə Azərbaycanın müstəqilliyi və ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad olunub. Toplantıda Azərbaycan Respublikasının Dövlət Himni səsləndirilib, Azərbaycan gəncliyindən bəhs edən film nümayiş olunub.
Konfransı giriş sözü ilə açan Abşeron rayon icra hakimiyyəti başçısının müavini Fuad Cəbrayılov əsası ulu öndər Heydər Əliyev tərəfindən qoyulan və Prezident İlham Əliyev tərəfindən uğurla icra edilən gənclər siyasətinin hazırkı gənc nəslin qarşısında yeni-yeni üfüqlər açdığını diqqətə çatdırıb. Natiq bu gün öz potensialını, istedad və bacarığını nümayiş etdirmək istəyən hər bir gənc üçün dövlət tərəfindən hərtərəfli şərait yaradıldığını bildirib. İcra rəsmisi, bu mənada Heydər Əliyev Fondunun vitse-prezidenti Leyla Əliyevanın öz fəaliyyəti ilə müasir Azərbaycan gəncliyi üçün örnək olduğunu xüsusi vurğulayıb. Abşeron gənclərinin son illərdə qazandığı uğurlardan danışan F.Cəbrayılov gənclərə Prezident İlham Əliyevin rəhbərliyi ilə vətənimizə, dövlətimizə və cəmiyyətimizə xidmətdə uğurlar arzulayıb.
“Qarabağ qaziləri” amputant futbol federasiyasının rəhbəri Rövşən Quliyev Prezident, Ali Baş Komandan İlham Əliyevin tapşırıq və tövsiyələrini hər zaman yüksək həvəslə yerinə yetirdiklərini və bu yolda mətin addımlarla irəlilədiklərini diqqətə çatdırıb.
Azərbaycan torpaqlarının 20 faizinin erməni qəsibkarları tərəfindən işğal olunduğunu və müharibə nəticəsində bir çox soydaşımızın öz həyatlarını və sağlamlıqlarını itirdiklərini qeyd edən R.Quliyev vurğulayıb ki, Azərbaycan höküməti hər zaman Qarabağ şəhidlərinin ailələrinə və qazilərə böyük diqqət və qayğı göstərmişdir, onların sosial problemlərinin həllinə çalışmış, sağlamlığını itirmiş müharibə əlillərinin cəmiyyətə inteqrasiyası istiqamətində əməli addımlar atmışdır.
Tədbirdə “Həmvətənlərə dəstək” İctimai Birliyinin sədri, Ehtiyatda olan polkovnik-leytenant Elmar Hüseynov qeyd edib ki, görüşün təşkil olunmasında məqsəd, qazilərin müharibə zamanı keçdiyi həyat yolunu, onların yaşadığı anları, müharibə ilə bağlı xatirələri öz dillərindən gənlərə catdırmaqdır.
Daha sonra çıxış edənlərdən ilahiyyatçı Hacı Şahin Həsənlini, Abşeron rayon ağsaqqallar şurasının sədri Nadir Ağayev, Azərbaycan Bayrağı ordenli İbad Hüseynov, Qarabağ qazisi İslam Əzimov, Xırdalan şəhər 2 nömrəli tam orta məktəbin ingilis dili müəllimi, ilin gənci Elnarə Həsənova Gənclər gününün MDB məkanında və Şərqi Avropa ölkələri arasında ilk dəfə Azərbaycanda qeyd olunmasından, bu günün 1997-ci ildə prezident Heydər Əliyevin sərəncamı ilə təsdiq olunmasının gəncliyə göstərdiyi diqqət və qayğının nümunəsi olduğundan və prezident İlham Əliyevin rəhbərliyi ilə həyata keçirilən dövlət gənclər siyasətinin Azərbaycan gəncliyinin inkişafına təkan verdiyini və onların özlərini cəmiyyətdə təsdiq etməsində mühüm rol oynadığından söz açıblar.
Sonda bayrağımız səhnəyə gətirilib, “Qarabağ qaziləri” amputant futbol federasiyası adından Azərbaycan Respublikası prezidentinə müraciət olunub.
Şamo Əliyev