Bu gün Abşeron rayon İcra Hakimiyyətinin başçısı İradə Gülməmmədova Türkiyənin Azərbaycandakı fövqəladə və səlahiyyətli səfiri Erkan Özoralla görüşüb. Rayon İcra Hakimiyyətində baş tutan görüşdə İ.Gülməmmədova Abşeron rayonu haqqında ümumi məlumat verib. Abşeronda 500 mindən çox əhalinin yaşadığını, həm kənd təsərrüfatı, həm də sənayə rayonu kimi inkişaf etdiyini deyən başçı mədəniyyəti, iqtisadiyyatı, milli adət-ənənələri, tarixi abidələri, turizm potensialı barədə danışıb. O qeyd edib ki, 1918-ci ildə general-mayor Nuru Paşanın komandanlığı ilə Qafqaz İslam Ordusunun erməni-rus işğalçılarına qarşı apardığı döyüşlərdə şəhid olan və Abşeron rayonunun Digah qəsəbəsindəki qəbiristanlığında dəfn edilən naməlum türk əsgərlərinin şərəfinə anım abidəsi inşa olunub. Bildirilib ki, Abşeron Rayon İcra Hakimiyyətinin dəstəyi ilə 150 kvadratmetr ərzaidə salınmış abidə müasir üslubda qurulub, şəhidlik kompleksinin ərazisi genişləndirilib, ətrafda abadlıq işləri görülüb, ədəd ağac və gül kolları əkilib.
Öz növbəsində səfir E.Özoral türk şəhidlərinə göstərilən ehtirama görə minnətdarlığını bildirərək qeyd edib ki, Azərbaycanla Türkiyə hər zaman bir yerdə olub, bundan sonra da birgə mübarizə aparacaqlar. Türk əsgərlərinin Qafqaz İslam Ordusunun tərkibində azərbaycanlı qardaşlarına köməklik göstərməsini qardaşlıq nümunəsi adlandıran səfir iki dövlətin qarşılıqlı münasibətlərinin bundan sonra daha inkişafı istiqamətində əlindən gələni edəcəyini söyləyib.
Görüşün sonunda xatirə şəkli çəkdirilib. Cənab səfirə xatirə hədiyyələri təqdim olunub.