Öz qələbəsi, əks-sədası ilə Azərbaycan tarixinə düşmüş 2016-cı ilin Aprel döyüşləri bizim ilk qalibiyyətimiz, ilk zəfər salnaməmizdir. Bu gün həmin şanlı döyüş zamanı torpaqlarımızın ərazi bütövlüyü uğrunda qəhrəmancasına döyüşüb şəhid olmuş Baxşəliyev Rəşid Əliyağa oğlunun şəhidlik adlı zirvəyə yüksəldiyi gündən 3 il ötür.Şəhidin məskunlaşdığı Abşeron Gənclər Şəhərciyində ildönümü mərasimi keçirilib.
Mərasimində Abşeron Rayon İcra Hakimiyyətinin başçısı İradə Gülməmmədova, vətən torpaqlarının azadlığı uğrunda mübarizədə şəhid olan və yaralanan hərbçilərin anaları, şəhidin döyüş yoldaşları, yaxınları, doğmaları, rayon ictimaiyyəti iştirak ediblər.
Mərasimdə şəhidin ruhuna dualar oxunub, döyüş yolundan danışılıb, ehsan verilib.
Şəhid analarına və onların doğmalarına dərin hüznlə başsağlığı verən, yaralılara şəfa diləyən İ.Gülməmmədova qeyd edib ki, bu gün şəhidimiz Baxşəliyev Rəşid Əliyağa oğlunun uca bir məqama - şəhidlik zirvəsinə ucaldığı gündən 3 il ötməsinə baxmayaraq o, daim bizim qəlbimizdə yaşayır. Onun əziz xatirəsi hər zaman yad edilir. Çünki Rəşid təkcə ata və anasının deyil, eyni zamanda, bu elin-obanın, bütöv Azərbaycan xalqının oğludur. Aprel şəhidimiz Rəşid Baxşəliyev, eləcə də digər şəhidlərimiz elə bir şanlı yol keçiblər ki, başda ölkə rəhbəri olmaqla bütün Azərbaycan xalqı onlarla fəxr edir.
İcra başçısı Azərbaycan Respublikasənən Prezidenti, Ali Baş Komandan İlham Əliyevin diqqəti və qayğısı sayəsində qısa bir zamanda ordumuzun qazandıqları nailiyyətlərdən söz açıb. Qeyd edib ki, Aprel döyüşləri bizi Qarabağda böyük qələbəyə aparan şanlı yolun başlanğıcıdır.
Mərasimdə çıxış edən “Həmvətənlərə dəstək” İctimai Birliyinin sədri, ehtiyatda olan polkovnik-leytenant Elmar Hüseynov qüdrətli Azərbaycan ordusunun düşmənə hər an tutarlı cavab verməyə hazır olduğunu, şəhidlərimizin qanının yerdə qalmayacağını bildirib.
Şəhidin anası Çimnaz Baxşəliyeva şəhidlərə və şəhid ailələrinə göstərdiyi diqqət və qayğıya görə cənab Prezident İlham Əliyevə özünün və ailəsinin adından dərin minnətdarlığını bildirib.
Sonda xanım başçı şəhid ailələri ilə görüşüb, onların qayğı və problemləri ilə maraqlanıb.
Allah şəhidimizə rəhmət eləsin!
Şamo Əliyev