Bu gün Abşeron rayonunda ümummilli lider Heydər Əliyevin anadan olmasının 96 illiyi ilə bağlı tədbir keçirilib. Tədbirdən əvvəl Rayon İcra Hakimiyyətinin başçısı İradə Gülməmmədova, rayonun hüquq-mühafizə orqanlarının rəhbərləri, idarə, müəssisə və ictimaiyyət nümayəndələri Xırdalan şəhərində yerləşən Heydər Əliyev Parkında Ulu Öndərin abidəsi önünə tər çiçəklər düzüb, əziz xatirəsini ehtiramla yad ediblər.
Bunun ardınca Abşeron rayon Mədəniyyət Evində tədbir davam etdirilib.
Proqram çərçivəsində ümummilli lider Heydər Əliyevin həyat və yaradıcılığı barəsində geniş məlumat verilib. Ulu Öndərin Abşerona etdiyi səfərindən söz açılıb. Onun xalqımız, dövlətimiz üçün gördüyü işlərdən, respublikamızın inkişafında həyata keçirdiyi siyasətdən, ölkəmizin dünya dövlətləri içərisində tanınmasında, söz sahibi olmasında göstərdiyi fəaliyyətdən danışılıb.
Qeyd edilib ki, görkəmli dövlət xadimi, dünya miqyaslı siyasətçi, Azərbaycan Milli dövlətçiliyini bütün təhlükələrdən xilas edib qoruyan və inkişaf etdirən qüdrətli şəxsiyyət kimi Heydər Əliyevin həyat və fəaliyyəti müasir tariximizin ən mühüm və şərəfli mərhələsini təşkil edir.
Bundan sonra tanınmış incəsənət xadimlərinin iştirakı ilə konsert proqramı təqdim olunub.