Abşeron Rayon İcra hakimiyyətinin başçısı İradə Gülməmmədovanın rayonun Novxanı kəndində sakinlərlə səyyar qəbul-görüşü keçirilib.
Əvvəlçə Abşeron Rayon İcra Hakimiyyətinin başçısı İradə Gülməmmədova Novxanı kəndinin Məmməd Əmin Rəsulzadə küçəsində olub, görülən işlərlə maraqlanıb.
Novxanı bələdiyyəsinin sədri Şahin Tağıyev görülən işlər barədə məlumat verərək bildirib ki, xanım başçının tapşırığı və rayonun daxili imkanları hesabına Novxanı kəndinin Məmməd Əmin Rəsulzadə küçəsi əsaslı şəkildə yenidən qurulur, 5 küçəyə isə qrabil tökülərək yayılıb.
Qeyd olunub ki, uzunluğu 1800 metr, eni isə 8-10 metr olan küçədə aparılan təmir işləri zamanı yolun köhnə asfalt-beton örtüyünün üst qatı frezlənərək ərazidən daşınır.
Novxanı bələdiyyəsinin inzibati binasında baş tutan görüşdə çıxış edən İ.Gülməmmədova respublika ərazisində, eləcə də Novxanı kəndində həyata keçirilən quruculuq-abadlıq işlərindən danışıb, kənd ərazisində böyük problemlərin olmadığını, ortaya çıxan yerli əhəmiyyətli çatışmamazlıqların da aradan qaldırıldığını söyləyib. Kəndin yeni salınan məhəllələrin lazimi kommunikasiya xəttləri ilə təmini istiqamətdə mühüm addımların atıldığını və bu istiqamətdə müsbət nəticələrin əldə edildiyini qeyd edən İ.Gülməmmədova Abşeronun digər kənd və qəsəbələrində olduğu kimi, Novxanıda da əhalinin sayının surətlə artdığını və bu səbəbdən də təbii olaraq müəyyən təlabatların yarandığını, onların da qarşılanması üçün lazimi tədbirlərin görüldüyünü deyib.
Sonra Novxanı bələdiyyəsinin sədri Şahin Tağıyev və Abşeron Rayon İcra Hakimiyyəti başçısının Novxanı kənd inzibati ərazi dairəsi üzrə nümayəndəsi Namiq Süleymanov hesabat xarakterli çıxış edərək görülən işlər, həyata keçirilən abadlıq-quruculuq tədbirləri barəsində məlumat veriblər .
Daha sonra kənd sakinləri çıxış edərək rayon icra başçısının kənd və qəsəbələrdə səyyar görüşlərinin keçirməsinin çox böyük əhəmiyyət daşıdığını, əhali tərəfindən irəli sürülən təkliflərinin reallaşmasında və problemlərin həll olunmasında müstəsna kömək etdiyini bildiriblər. Vətəndaşlar tərəfindən səsləndirilən müraciətlər əsasən sosial problemlər, küçələrin abadlaşdırılması və digər məsələlər barədə olub.
Sakinlər tərəfindən qaldırılan məsələlərin mümkünləri yerindəcə həll olunub, müəyyən vaxt və vəsait tələb edən digər məsələlərin həlli istiqamətində isə müvafiq tapşırıqlar verilib.