Abşeron rayon İcra Hakimiyyətinin başçısı İradə Gülməmmədovanın təşəbbüsü ilə icrasına başlanılan “Nümunəvi məhəllə” layihəsi çərçivəsində abadlıq-quruculuq işləri yüksək templə davam etdirilir.
Məqsəd rayon ərazisində, küçə və məhəllələrdə abadlıq işlərini intensiv və mütəşəkkil formada davam etdirmək, evləri, həyətləri, məhəllələri, küçələri daha təmiz və səliqəli saxlamaq, salınmış yaşıllıqları qorumaq, ağaclar, bitkilər əkməklə yeni-yeni yaşıllıq zolaqları yaratmaq, rayonu abadlaşdırmaqla yanaşı, həm də vətəndaş məmnunluğunu təmin etməkdir.
Rayonun daxili imkanları hesabına Xırdalan şəhər Məmməd Əmin Rəsulzadə küçəsində yerləşən (Razqrad deyilən ərazi) 8, 9, 10, 11 saylı çoxmənzilli yaşayış binalarının əhatə etdiyi məhəllədə əsaslı təmir işləri çərcivəsində binaların giriş hissəsi təmir olunub, pilləkənlər yenidən qurularaq aqlay döşənib.Burada səkilərə yeni bordür daşları düzülüb, sakinlərin istirahəti üçün geniş söhbətgah quraşdırılıb, həyət boyunca oturacaqlar qoyulub. Ərazidə əsaslı təmizlik işləri aparılıb, zəbt olunaraq hasarlanmış bağ sahələri, qanunsuz qaraj və digər tikililər sökülüb, yeri təmizlənib, həyətə və ətraf əraziyə yeni asfalt örtüyü çəkilib.
Ərazidə yaşayan rayon sakini Leyla Quliyeva görülən işlərin hamının ürəyincə olduğunu bildirib: "İndi rayonun hər tərəfində abadlıq işləri aparılır. 22 ildir bu rayonda yaşayıram, amma belə genişmiqyaslı abadlıq işlərinin şahidi olmamışam. Yaşadığımız binanın arxa tərəfi bərbad vəziyyətdə idi. Orada “Nümünəvi məhəllə”nin yaradılacağını eşidəndə çox sevindik. ”.
Digər rayon sakini Vəfa Rzayeva isə qeyd edib ki, son vaxtlar Abşeron rayonunda aparılan genişmiqyaslı yaşıllaşdırma işləri göz oxşayır: “ Xırdalanda bundan əvvəl də bir neçə nümunəvi məhəllə yaradılıb. Əksər yaşayış binalarının qarşısında mini-parklar, geniş yaşıllıqlar salınıb. Görülən işlərin nəticəsidir ki, Xırdalan şəhəri ən gözəl və baxımlı məkanlardan birinə çevrilib”.
Rayon sakini Elnur Babayev sözlərinə görə, son vaxtlar rayonda görülən işlər sakinlərin arzularının reallaşmasına səbəb olur: “Abşeron rayonunda həqiqətən də böyük işlər görülür - park və bağlar salınır, yollarımız yenidən qurulur. Vaxtilə zibillə çirklənmiş ərazilər təmizlənir, yerində abad məhəllələr salınır. «Nümünəvi məhəllə" layihəsi çərçivəsində yeni zibil qutuları qoyulur. Abadlıq-quruculuq işləri çərçivəsində qanunsuz tikililər, çəpərlər sökülərək ləğv edilir”.
