Rayon icra hakimiyyətinin başçısı İradə Gülməmmədovanın rayonun maddi-mədəniyyət abidələrinin, müqəddəs ocaqlarının bərpası ilə bağlı verdiyi tapşırığa əsasən başlanılan təmir işlərinin artıq böyük bir qismi başa çatmaq üzrədir.
Abşeron rayonundakı tarixi abidələrdən biri də Məmmədli kəndində yerləşən “Şahsevən” məscididir.1819-cu ildə inşa edilmiş bu abidə keçmiş Sovet hakimiyyəti dövründə müxtəlif məqsədlər üçün istifadə olunub. Sonuncu dəfə isə məscid 1984-cü ildə təmir olunub.
Abşeron rayon icra hakimiyyətinin başçısı İradə Gülməmmədova Məmmədli kənd məscidində aparılan bərpa və yenidənqurma işlərinin vəziyyəti ilə yaxından tanış olub. Aparılan təmir-tikinti işlərinin yaxın zamanlarda başa çatdırılacağını vurğulayan Məmmədli kənd bələdiyyəsinin sədri Vasif Məmmədov Abşeron rayon icra hakimiyyətinin başçısı İradə Gülməmmədovaya görülən işlər barədə ətraflı məlumat verib. Bildirilib ki, Ümumi ərazisi 700 kv. olan məsciddə, xidməti otaqlar, 240 yerlik mərasim zalı inşa olunub.
Daha sonra İ.Gülməmmədova bildirdi ki, Azərbaycanda dini-mənəvi dəyərlərin qorunmasına hər zaman yüksək diqqət göstərilib. Həm ümummilli lider Heydər Əliyevin hakimiyyəti illərində, həm də Prezident İlham Əliyevin rəhbərliyi ilə xalqımızın dini-mənəvi dəyərlərinin qorunması və inkişafı diqqət mərkəzində saxlanılıb. Son bir neçə ildə rayonda onlarla məscid, ibadətgah və dini ziyarətgah təmir olunaraq xalqın istifadəsinə verilib.
Məlumat üçün bildirək ki, Abşeron rayon icra hakimiyyətinin başçısının tapşırığı ilə Məmmədli məscidinin binasının təmir- tikinti işlərinə 2017-ci il iyulun 6-da başlanılmışdı. Xanım başçı məscidin binasının tikintisini daim diqqət mərkəzində saxlayıb, burada həyata keçirilən inşaat işlərinin gedişi ilə maraqlanıb, görülən işlərlə bağlı müvafiq tapşırıqlarını verib.