Gürcüstandakı Mirzə Fətəli Axundzadə adına Azərbaycan Mədəniyyəti Muzeyi və Mərkəzinin dəvətinə əsasən Abşeron rayon Xırdalan şəhər Uşaq Musiqi Məktəbinin müəllim və şagirdləri 2014-cü il 20-22 dekabr tarixində Tbilisi və Marneuli şəhərlərində 31 Dekabr Dünya Azərbaycanlılarının Həmrəylik Günü münasibətilə təşkil olunmuş tədbirlərdə iştirak etmək məqsədilə Gürcüstana səfər etmişlər.
M.F.Axundov adına Azərbaycan Mədəniyyəti Muzeyinin, Marneuli Resurs Mərkəzinin və Azərbaycan Mədəniyyəti Mərkəzinin təşkili ilə 20 dekabr tarixində Marneuli şəhər 8 nömrəli orta məktəbdə Xırdalan şəhər Uşaq Musiqi Məktəbinin xalq çalğı alətləri orkestri Azərbaycan klassik və xalq musiqisindən ibarət konsert proqramı ilə çıxış etmişdir. Dekabrın 21-də məktəbin müəllim və şagirdləri Mirzə Fətəli Axundzadə adına Azərbaycan Mədəniyyəti Muzeyində olmuşlar. Tədbirdə Azərbaycan Respublikasının Gürcüstandakı Səfirliyinin nümayəndəsi iştirak edərək şagirdlərə hədiyyələr təqdim etmişdir.
22 dekabr tarixində Tbilisi şəhər 64 nömrəli orta məktəbdə Xırdalan şəhər Uşaq Musiqi Məktəbinin şagirdlərinin konserti keçirdilər
Gürcüstandakı Azərbaycan Mədəniyyət Mərkəzinin rəhbərliyi bu tədbirlərin Azərbaycan mədəniyyətinin təbliğində, Gürcüstanda yaşayan soydaşlarımızla mədəni əməkdaşlığın inkişaf etdirilməsində, iki ölkənin gəncləri arasında dostluq münasibətlərinin yaradılmasında, gənclərdə milli musiqimizə maraq oyadılmasında böyük əhəmiyyətini qeyd etmişdir.