Abşeron Rayon İcra Hakimiyyətinin başçısı İradə Gülməmmədova II Qarabağ müharibəsində şəhid olan Ələkbərov Əli Ələkbər oğlunun evinə gedərək ailəsinə baş çəkib. Xırdalan şəhərində yerləşən evlərində şəhidin anası Bağırova Rəna Cahangir qızı və şəhidin həyat yoldaşı Ələkbarova Lalə Cəbrayıl qızı ilə görüşən başçı ailənin qayğıları və problemləri ilə maraqlanıb.
Bildirilib ki, hər bir Azərbaycanlı kimi Ə.Ələkbərov da torpaqlarımızın işğal altında olması ilə heç bir zaman barışmayıb. Ona görə də silaha sarılaraq vətənimizin azadlığı uğrunda müharibəyə gedib. 12.10.1985-ci il tarixində Tovuz rayonunun Bozalqanlı kəndində anadan olan Ə.Ələkbərov II Qarabağ müharibəsində igidliklə döyüşərək şəhidlik zirvəsinə ucalıb.
Qeyd edilib ki, şəhidin qəbirüstü abidəsinin Rayon İcra Hakimiyyəti tərəfindən götürülməsi istiqamətində addımlar atılıb və yaxın günlərdə abidə tam hazır olacaq. Ailənin sosial vəziyyəti nəzərə alınaraq RİH tərəfindən maddi yardım göstərilib.
Allah rəhmət eləsin!