Fevralın 27-də Yeni Azərbaycan Partiyası Abşeron rayon təşkilatı Gənclər Birliyinin IV konfransı keçirilib. Konfransda YAP Abşeron rayon təşkilatının sədri Bilman Vəliyev, Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru Vüqar Rəhimzadə, Abşeron rayon İcra Hakimiyyəti başçısının birinci müavini İradə Gülməmmədova iştirak ediblər.
Tədbiri giriş sözü ilə açan YAP Abşeron rayon təşkilatının sədri Bilman Vəliyev Yeni Azərbaycan Partiyasının Sədri, Prezident İlham Əliyevin rəhbərliyi ilə ölkəmizdə gedən sürətli quruculuq-abadlıq işlərindən, daxili və xarici siyasət sahəsində qazanılmış uğurlardan, Azərbaycan gənclərinin sağlam ruhda böyüməsi və layiqli vətəndaşlar kimi yetişməsi üçün ötən illər ərzində ölkə rəhbərliyi tərəfindən həyata keçirilən ardıcıl və sistemli tədbirlərdən danışıb. B.Vəliyev qeyd edib ki, Yeni Azərbaycan Partiyası Abşeron rayon təşkilatının Gənclər Birliyinin üzvləri rayon təşkilatında birləşən üzvlərin 50 faizdən çoxunu təşkil edir. YAP Abşeron rayon təşkilatının sədri çıxışının sonunda vurğulayıb ki, bu gün Ulu öndər Heydər Əliyev ideyalarından bəhrələnən Azərbaycan gəncliyi Prezident İlham Əliyevin ətrafında sıx birləşərək gələcəyə inamla addımlayır.
YAP Abşeron rayon təşkilatı Gənclər Birliyinin sədri Elgün Hümbətov ötən konfransdan keçən müddət ərzində YAP Abşeron rayon təşkilatı Gənclər Birliyinin gördüyü işlər barədə məlumat verib.
Konfransda YAP Abşeron rayon təşkilatı Gənclər Birliyinin üzvləri Fərid Dilavərov və Rəşad Baxışəliyev çıxış edib hesabatı qənaətbəxş qiymətləndirərək əmin olduqlarını bildiriblər ki, bu konfrans YAP Abşeron rayon təşkilatı Gənclər Birliyinin işini daha səmərəli qurmağa və daha böyük nailiyyətlər qazanmağa şərait yaradacaq.
Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru Vüqar Rəhimzadə çıxış edərək bildirib ki, Yeni Azərbaycan Partiyası cəmiyyətimizin ən güclü siyasi təşkilatı kimi ölkəmizdəki ictimai-siyasi proseslərin həmişə mərkəzində olub.
V.Rəhimzadə vurğulayıb ki, bu gün Ümummilli lider Heydər Əliyev siyasətini uğurla davam və inkişaf etdirən ölkə Prezidenti, partiyamızın Sədri İlham Əliyevin gənclərə olan diqqət və qayğısı hər birimizin ürəyincədir. Azərbaycan gəncliyi bu diqqət və qayğını yüksək dəyərləndirir, öz məsuliyyətini dərk edir və Prezident İlham Əliyevin müəyyənləşdirdiyi strateji vəzifələrin uğurla həyata keçirilməsinə öz töhfəsini verməyə çalışır. YAP Siyasi Şurasının üzvü çıxışının sonunda YAP Abşeron rayon təşkilatı Gənclər Birliyinin gələcək fəaliyyətinə uğurlar arzulayıb.
Tədbirdə çıxış edən YAP Abşeron rayon təşkilatının İdarə Heyətinin üzvü, Abşeron rayon İcra Hakimiyyəti başçısının birinci müavini İradə Gülməmmədova YAP Abşeron rayon təşkilatı Gənclər Birliyinin fəaliyyətini yüksək qiymətləndirərək bildirib ki, Gənclər Birliyinin üzvləri Abşeron rayonunun ictimai-siyasi həyatında fəal iştirak edirlər. İ.Gülməmmədova, həmçinin, rayonda həyata keçirilən abadlıq və quruculuq işləri haqqında da ətraflı məlumat verərək gəncləri bu istiqamətdə fəal olmağa çağırıb.
Sonra təşkilati məsələlərə baxılıb. YAP Abşeron rayon təşkilatı Gənclər Birliyinin 23 nəfərdən ibarət Şura üzvləri, 11 nəfərdən ibarət Gənclər Birliyinin İdarə Heyətinin üzvləri seçiliblər. Rayon Gənclər Birliyinin sədri Elgün Hümbətov, müavinləri isə Rəşad Baxışəliyev və Elgün İsgəndərov seçiliblər. YAP Gənclər Birliyinin respublika konfransına 4 nəfər nümayəndə seçilib.
Tədbirdə bir qrup partiya üzvünə vəsiqələr təqdim olunub.
