Martın 3-ü xalq təqvimi ilə boz ayın axır çərşənbələrindən ikincisi, Od çərşənbəsi idi. Adət-ənənəyə görə, bu gün tonqal qalayıb, alovun üzərindən tullanmaqla daxildə olan bütün çirkabı və azar - bezarları yandırırlar. Odun, tonqalın olması istiliyin mənasını ifadə edir və yazın gəlişi də havaların isinməsinin əsas göstəricisidir.
Azərbaycan xalqının mədəni irsinin, folklorunun, adət-ənənələrinin qorunması və təbliğində Novruz bayramının böyük əhəmiyyətini nəzərə alaraq, artıq yeddinci ildir ki, "Yanar dağ" Dövlət tarix-mədəniyyət və təbiət qoruğunda bayram şənlikləri keçirilir.Martın 3-də Od çərşənbəsi münasibətilə "Yanar dağ"da gerçəkləşən "Yurduma bahar gəlir" adlı tədbir də rəngli görüntülərlə yadda qalıb.
Şənlik böyük konsert proqramı ilə başlayıb.Abşeron rayonun musiqi məktəbləri şagirdlərinin, Abşeron rayon Mədəniyyət evi kollektivi üzvlərinin ifaları hamını riqqətə gətirdi. Məktəbli qızların məharətlə ifa etdikləri rəqslər, səslənən gözəl nəğmələr hamıda əsl Novruz təəssüratı və bayram əhval -ruhiyyəsi yaratdı.