Novruz bayramı Abşeron rayonunda yerləşən təhsil müəssisələrində də böyük sevinc və maraq hissi ilə qarşılanır.
Tarix:17-03-2015, 13:02
Elimizə-obamıza bahar gəlir! Qaranquş müjdəli, xoş ovqatlı, çiçək ətirli, xonçalı Novruz Azərbaycan xalqının bayramlarının şahı sayılır. Çünki Novruz bayramı Azərbaycan xalqının gələcəyə inam hissini, ürək açıqlığını, qonaq sevərliyini, ünsiyyət, mehribançılıq və dostluq duyğularını özündə əks etdirir. Qeyd edək ki, Novruz bayramı həm də şən gülüşlər, humanist ideyalar bayramı kimiqiymətləndirilir. Bayramın gəlişi Azərbaycanın hər bir yerində olduğu kimi, Abşeron rayonunda yerləşən təhsil müəssisələrində də böyük sevinc və maraq hissi ilə qarşılanır.
Xırdalan şəhər 1 nömrəli orta məktəbdə də Novruz bayramı böyük təmtəraqla qeyd edildi. Dəhlizlərdə bayram şirniyyatları və böyük səməni qoyulmuşdu. Bayram mərasimini açan məktəbin direktoru Kamran Rzayev şənlik iştirakçılarını təbrik etdi, Novruzun tarixi və adət-ənənələri haqqında danışdı. Şagirdlər şairlərimizin, aşıqlarımızın Novruza, baharın gəlişinə həsr etdikləri şeirlərindən parçalar söylədilər, səhnəciklər göstərdilər. Onlar nənə və babalarından eşitdikləri xalq inanclarını, deyimlərini tədbir iştirakçılarına çatdırdılar. Milli geyimli şagirdlərin ifasında rəqs nömrələri göstərildi. Kosa ilə Keçəlin məzəli rəqsləri şagirdlərdə yazla qışın görüşü təəssuratını yaratdı.
Şənliyin sonunda Abşeron rayon təhsil şöbəsinin müdüri Nadir Ağayev tədbir iştirakçılarını bayram münasibətilə təbrik etdi. O dedi ki, Novruz el bayramıdır. Əsrlərin qaynaqlarından süzülüb gələn, yaddaşlarda kök salan qədim bir el bayramıdır. Novruz bayramının xalqımızın həyatındakı rolunu yüksək qiymətləndirən böyük dövlət xadimi, ümummilli lider Heydər Əliyev demişdir: "Böyük mənəvi gücə malik olan Novruz bayramı ulu əcdadlarımızın bizə verdiyi ən gözəl yadigar olub, Azərbaycan xalqının milli ruhunu və yaddaşını, onun daxili aləmini bütün zənginliyi ilə yaşadır. Təbiətin oyanışının, varlığın yenidən canlanmasının müjdəsini verən Novruz bayramı ən qədim zamanlardan bəri həyat və məişətimizə daxil olmuş, insanlara aydın və işıqlı sabaha, xoşbəxt gələcəyə inam duyğusu bəxş etmişdir".
Bahar bayramının ruh yüksəkliyi ilə qeyd olunduğu daha bir məktəb 2 nömrəli orta məktəb oldu.Abşeron rayon Xırdalan şəhəri 2 nömrəli tam orta məktəbdə Novruz bayramına həsr olunan “Yurdumuza bahar gəlir” adlı tədbir keçirilib.Tədbirdə məktəbin şagirdləri, müəllimləri, valideynləri iştirak ediblər. Tədbiri açıq elan edən məktəbin direktoru Ədalət xanım Camalova şənlik iştirakçılarının bayramını təbrik etdi. Bildirildi ki, bahar öz gəlişi ilə sevinc gətirir, ürəklərdə mərhəmət, diqqət və qayğı hisslərini artırır. Xalqımız bu bayrama çox böyük sevinclə hazırlaşır. Məktəbin şagirdlərinin təşkil etdiyi tədbirdə uşaqların ifasında şerlər, mahnılar səslənib, musiqi nömrələri ifa olunub. Keçəl və kosanın gəlişi məclisi daha da şənləndirib.
İlaxır çərşənbə ərəfəsində 5 nömrəli orta məktəbdə bayram abu-havası xüsusilə hiss olunurdu.Abşeron rayon Xırdalan şəhər 5 nömrəli orta məktəbində Novruz bayramı münasibətilə bayram şənliyi keçirildi. Tədbirdə çıxış edən məktəbin direktoru Şahin Yusifov Novruz bayramı münasibəti ilə məktəbliləri və qonaqları təbrik edərək bu bayramın tarixi köklərindən danışdı. Məktəbin rəqs və xor kollektivinin hazırladığı musiqili proqram və ədəbi-bədii kompozisiya qonaqlara zövqlü dəqiqələr yaşatdı.