Abşeronda “Şahin” hərbi-idman oyununun rayon birinciliyi (Video)

Dövlət Proqramının 6.2.5. yarımbəndinə müvafiq olaraq məktəblilərin hərbi hazırlığının gücləndirilməsi, ordu sıralarında hərbi xidmətə hazırlığının yüksəldilməsi məqsədilə məktəblilər arasında növbəti dəfə “Şahin” hərbi-idman oyunu keçirilmişdir.
Qeyd edək ki, “Şahin” hərbi-idman oyunu Gənclər və İdman, Fövqəladə Hallar, Mədəniyyət və Turizm, Təhsil və Müdafiə Nazirliklərinin, Könüllü Hərbi Vətənpərvərlik Texniki İdman Cəmiyyəti Respublika Şurasının və Respublika Veteranlar Şurasının birgə qərarı ilə 1996-cı ildən başlayaraq orta məktəblərin X-XI sinif şagirdləri arasında keçirilir.
Abşeron rayon Gənclər və İdman idarəsinin təşkilatçılığı ilə Təhsil və Səfərbərlik və Hərbi xidmətə Çağırış üzrə Dövlət Xidmətinin Abşeron rayon şöbəsinin birgə təsdiq etdikləri tədbirlər planına əsasən mart ayının 29-da “Şahin” hərbi-idman oyununun rayon birinciliyi keçirilmişdir.

Tədbiri giriş sözü ilə açan Abşeron rayon Gənclər və İdman idarəsinin rəisi Əsgər Əmirəliyev hər il keçirilən “Şahin” hərbi idman oyununun yeniyetmə və gənclərin vətənpərvərlik tərbiyəsinin möhkəmləndirilməsində böyük rol oynadığını nəzərə çatdırdı. Sonra çıxış edən Abşeron təhsil şöbəsinin metodisti Aslan Həziyev gənclərin vətənpərvərlik və vətəndaşlıq tərbiyəsinin daim dövlətin diqqət mərkəzində olduğunu, bu sahədə aparılan işlərin səmərəsinin artırılması istiqamətində silsilə tədbirlərin həyata keçirildiyini bildirdi.
Çıxışlardan sonra yarışa start verildi. Yarışda 30 orta ümumtəhsil məktəbindən hər bir komandanın tərkibi 14 nəfər (10 oğlan, 4 qız) olmaqla 420 nəfər 10-11-ci sinif şagirdi iştirak edirdi.
Yarışın nəticələrinə görə Saray 1 №-li tam orta məktəbin komandası I, Qobu 1 №-li tam orta məktəbin komandası II, Novxanı 1 №-li tam orta məktəbin komandası isə III yerə layiq görülüb.
1,2,3-cü yer tutmuş komandalara Abşeron rayon Gənclər və İdman idarəsinin diplomları və kubokları təqdim olunmuşdur və rayon birincisi Saray 1 №-li tam orta məktəbin komandası Xacmaz şəhərində keçiriləcək “Şahin” hərbi-idman oyununun zona birinciliyində rayonu təmsil etmək hüququ qazanıb.


Baş redaktor: Şamo Əliyev